Yay fəsli ən çox insanların qışa hazırlanması kimi yaddaşlarda həkk olunub. Müxtəlif mürəbbələr bişirilir, şorabalar bağlanılır və s. bununla yanaşı bizim kəndlərdə eyni zamanda insanlar qışda istiliklərini təmin etmək üçün də tədarük görürlər, odun alıb yığırlar. Bu xüsusilə qış uzun olan qərb rayonunda böyük problemə çevrilir. Bunlardan biri də Gədəby rayonudur. Rayonun əksər kəndlərində qaz olmadığı üçün insanlar qışda istiliklə bağlı əziyyət çəkirlər.
“Ermənistanla sərhəddə yerləşən Gədəbəy rayonun əksər kəndlərində ciddi qaz problemi var. Prezidentin tapşırığı ilə 2010-cu ilin sonuna qədər “Azəriqaz” ora qaz çəkməli idi. Amma işlər getmir”. Bu sözləri Modern.az saytına açıqlamasında “Yeni Müsavat” qəzetinin əməkdaşı Fərhad Məmmədov deyib. O, Gədəbəyin yalnız bir kəndində qaz olduğunu qeyd edib. “Cəmi bir kənddə qaz var, o da çox az hissəsində var. Qalan kəndlərdə isə yoxdur. Qışda qızınmaq üçün hər ailəyə 8 kub odun lazım olur. Başqa mənbə olmadığı üçün odun meşələrdən tədarük olunur. Bu səbəbdən meşələr artıq tükənmək üzrədir. Nəticədə ekoloji problem yaranır”.
