Zaqatala-Qax bölgəsində baş verən zəlzələdən sonra əhalinin bir hissəsi çadırlarda məskunlaşıblar. Evlərinin hələ də tikilib hazır olmamasından şikayətlənən sakinlər, üstəlik, çadırlara yardımların paylanmamasından da gileylənirlər. Sakinlər bildirirlər ki, Zaqatalanın Gözbaraq, Sabıncı kəndinə yardım gəlsə də, İkinci Tala kəndinə yardımın gəlməyi ilə yoxa çıxmağı bir oldu. Onların əksər hissəsinə yardım çatmayıb.
111 saylı Zaqatala-Balakən seçki dairəsinin deputatı Kamilə Əliyeva
Modern.az-a bildirib ki, bu məsələdən xəbərsizdir: “Düzünü desəm, bundan xəbərim yoxdur. 20 gün əvvəl Zaqatalada oldum, çadırlarda yaşayan, ümumiyyətlə, zəlzələdən əziyyət çəkənlərlə tanış oldum. Belə bir məlumat mənə heç bir adam tərəfindən verilmədi və bu barədə başqasından da eşitməmişəm. Yardımların onlara çatdırılmaması barəsində məndə heç bir məlumat yoxdur. Əksinə, onlara nəinki dövlət tərəfindən, eləcə də Qızıl Aypara Cəmiyyəti tərəfindən yardım olundu”.
Deputat qeyd edib ki, bu söhbətlərin haradan qaynaqlandığının heç bir əsası yoxdur: “Mən bu söhbətlərin haradan qaynaqlandığını bilmirəm. Ümumiyyətlə, mən orada olan müddətdə belə söhbətlər yox idi. Birinci dəfədir ki, sizdən eşidirəm. Əksinə, sakinlər yardımların verilməsinə görə hökumətə minnətdarlıqlarını bildirirdilər. Dövlət tərəfindən verilən yardımın realizə olunması aydın məsələdir ki, icra hakimiyyəti və orada xüsusi yaradılmış komissiyanın nəzarəti altındadır. Həmin yardımlar da çatdırılıb”.
Nihadə Eyyubova
