Təhsil Nazirliyi 6 yaşı tamam olmayan uşaqları I sinfə qəbul edəcək | Modern.az

Təhsil Nazirliyi bu il I sinfə daxil olmaq üçün 6 yaşı tamam olmayan uşaqların valideynlərinin müraciətləri araşdıraraq, müvafiq qərar verəcək. Təhsil Nazirliyindən Modern.az-a verilən məlumata görə, istisna hallarda oktyabrın sonunadək 6 yaşı tamam olacaq istedadlı uşaqlar da məktəbdə yaradılmış komissiyanın rəyi əsasında vaxtından əvvəl I sinfə qəbul ediləcəklər.

“Təhsil nazirinin əmri ilə təsdiq olunmuş müvafiq qaydalara əsasən, ümumi təhsil məktəblərinə, bir qayda olaraq, hər il sentyabrın 15-dək 6 yaşı tamam olmuş əqli və fizioloji cəhətdən sağlam uşaqlar qəbul edilirlər. Noyabrda 6 yaşı tamam olacaq xüsusi istedadı ilə fərqlənən uşaqların vaxtından əvvəl I sinfə qəbulu məsələsinə isə avqustun əvvəlindən sentyabrın 10-dək Təhsil Nazirliyində yaradılmış komissiya tərəfindən baxılıb müvafiq qərar verilir”-deyə nazirlikdən bildirilib.

Qeyd edək ki, 2012-2013-cü tədris ilində ölkəmizin ümumi təhsil məktəblərinin I sinfinə 130454 şagirdin qəbul olunacağı proqnozlaşdırılır. Ötən dərs ilində isə I sinif şagirdlərinin sayı 125408 nəfər olub. Bu göstərici, 2010-2011-ci tədris ilində isə 120032 nəfər təşkil edib. Yeni tədris ilində Bakı şəhərindəki ümumi təhsil məktəblərinin I sinfinə 36102 şagirdin qəbulu gözlənilir. Ötən tədris ilində bu göstərici 35509 nəfər olub.

 

  Anar RÜSTƏMOV