Azərbaycan Respublikası İqtisadi İslahatların Təhlili və Kommunikasiya Mərkəzinin (İİTKM) “İslahat Könüllüləri” Təşkilatının təşəbbüsü ilə Azərbaycan Respublikasının Milli Məclisinin Mədəniyyət komitəsinin sədri Qənirə Paşayevanın könüllülərlə “Azərbaycan mədəniyyətinin təbliğində gənclərin rolu” mövzusunda görüşü keçirilib.
Modern.az xəbər verir ki, onlayn formatda keçirilən görüşdə Qənirə Paşayeva öncə Azərbaycan Respublikasının Prezidenti cənab İlham Əliyevin rəhbərliyi ilə ölkəmizin mədəni həyatındakı islahatlar, beynəlxalq səviyyəli qərarlar barədə könüllülərə məlumat verib. O, könüllü təşkilatlarının, eləcə də gənclərin ölkəmizin mədəniyyətinin təbliğindəki böyük rolundan danışıb.
Şuşanın Azərbaycanın Mədəniyyət paytaxtı elan edilməsinə toxunan Komitə sədri, "Xarı bülbül" Festivalının, "Vaqif Poeziya Günləri"nin bərpa edilməsinin və Aşıq Ələsgərin 200 illik yubileyinin keçirilməsi ilə bağlı Prezident Sərəncamının dünya azərbaycanlılarına, bütün tərəqqipərvər dünyaya tarixi ismarınc dəyərində olduğunu vurğulayıb.
Bildirib ki, Azərbaycanın artıq bütün dünyada tanınan özünəməxsus mədəni dəyərləri və meyarları mövcuddur. Məhz bu səbəbdən gənclər öz innovativ fəaliyyətləri ilə mədəni irsimizi qorumaq və inkişaf etdirmək üçün ilk öncə tarixini gözəl bilməlidir.
Q.Paşayeva Azərbaycan Respublikasında 2021-ci ilin “Nizami Gəncəvi İli” elan edilməsi haqqında Prezident Sərəncamı barədə də danışıb. Qeyd edib ki, dahi Nizaminin xalqımızın mənəviyyatının ayrılmaz hissəsinə çevrilən parlaq irsi əsrlərdən bəri Şərqin, bütövlükdə, bəşər mədəniyyətinin misilsiz mədəni sərvətlər xəzinəsində özünəməxsus layiqli yerini qoruyub saxlayır. Azərbaycan gəncləri də Nizami ideyalarını yaşadaraq, ölkəmizin iqtisadi, sosial, təhsil eləcə də digər sahələrindəki inkişafına öz töhfələrini verməlidirlər.
İslahat Könüllüləri, ASAN Könüllüləri, Aqrar İnkişaf Könüllüləri, DOST könüllüləri, Könüllü gömrükçülər, BİR Könüllüləri və digər təşkilatların könüllüləri olmaqla, 100-dən artıq könüllünün iştirak etdiyi tədbirdə gənclər Komitə sədri ilə mövzu ilə bağlı fikirlərini bölüşüb, ona suallar ünvanlayıb.
