Artıq gözəl Novruz-xalqımızın illərdən bəri yaşatdığı Bahar bayramı yenicə torpağımıza ,yurdumuza qədəm qoyub.Novruz çərşənbələri başlayandan bütün ölkə boyu,30 ildən sonra işğaldan azad edilmiş rayonlarımızda-yağı düşmənin caynağından Şanlı Ordumuzun igidlərinin qanı,canı hesabına, Ali Baş Komandanımızın qətiyyəti sayəsində Şuşada, Zəngilanda, Kəlbəcərdə, Ağdamda, bir sözlə, yenidən tam bizim olan bütün torpaqlarımızda bayram tonqalları alovlanmaqdadır. Mətbuatda və sosial şəbəkələrdə yayılan görüntülər çox möhtəşəmdir,qürurvercidir,düşmən gözü çıxarandır,atəşindir...Bunlar öz yerində.
Mən öz tonqalımdan yazacağam. Daha doğrusu,öz gördüyüm tonqaldan.Özümün və özüm qarışıq 30 həmkarımın gördüyü ilk qələbə tonqalından...
O möhtəşəm günü unudammıram.Unutmaq da mümkün deyil.Bu ilin əvvəlində,yanvarın 5-6-da Dövlət Sərhəd Xidmətinin mətbuat nümayəndələri üçün Zəngilana təşkil etdiyi infotur iştirakçıları arasında mən də vardım.(Şimaldan Qubadakı "QafqazTV"-nin əməkdaşı həm mənə operatorluq edirdi,həm də yerli televiziya üçün süjet hazırlayırdı) Bu səfər haqda geniş yazdığımdan indi yalnız o möhtəşəm tonqaldan danışacağam.Səfərdə işinin çox olmasına baxmayaraq jurnalistləri tək qoymayan DSX rəisi,general-polkovnik Elçin Quliyevin göstərişilə yerləşdiyimiz Məlikli kəndindəki komendantlığın qarşısında qaş qaralanda bir tonqal qalanmışdı ki...Çartıltısı həm illərin sükutuna bələnmiş,həm də zorən düşmənin iyrənc addımlarına alışmış Vətən torpağına yayılmaqda idi.Bir gecəlik otaq yoldaşım olacaq Dövlət Televiziyasının gənc əməkdaşı Vəfa Ağabalayeva ilə biz də tonqala yaxınlaşdıq.Havanın soyuqluğu adamın canına vic-vicə salsa da tonqalın istiliyi dərhal üşütməmizi yox elədi...
Bu tonqal bir başqa tonqal idi.Sözlə deməli deyil,gərək gözünlə görəsən.Möhtəşəm idi,ilk idi...Tarixi qələbədən sonra mətbuatın gördüyü ilk qələbə tonqalı idi.Təvazökarlığını çoxdan bildiyim və 29 ildir yaxından tanıdığım general Quliyev jurnalistlərlə ,həmişəki kimi səmimi idi,açıq idi...Qadağa bir özünə və hər birimizin təhlükəsizlik qaydalarına əməl etməyimizlə bağlı idi.Bizə möhkəm-möhkəm tapşırmışdı ki, "Məni çəkməyin,azad olunmuş ərazilərimizi çəkin,görün ki,nankor qonşumuz nə cür vəhşiliklər törədib torpaqlrımızda".
Başqalarını deyə bilmərəm,mən Zəngilan səfəri ilə bağlı təəssüratımı qələmə alanda hörmətli generalın sözünə əməl etmişdim,yazıda şəxsi arxivim üçün Əlövsətin oğrun-oğrun çəkdiyi şəkil və videolardan istifadə etməmişdim.Amma indi...Bağışlayın məni, cənab general!!! Mən tonqal başında sizdən eşitdiklərimi dilə gətirməklə bu yazımda susmaq feilindən sanki imtina etdim.Məqamı gəldiyi üçün daha yazmaya bilmədim...
Tonqal başındakı səmimi söhbət zamanı 44 günlük Vətən müharibəsindəki tarixi qələbəmizdən ətraflı danışıldı. Söhbətin baş qəhrəmanı canını Qarabağ uğrunda fəda etmiş şəhidlərimiz, bütün Qoşun növlərindən ibarət Ordumuzun cəsur şəxsi heyəti və öz qətiyyəti və müdrikliyi ilə dünyanın diqqətini cəlb edən Müzəffər Ali Baş Komandanımız İlham Əliyev idi. Jurnalistlərə bir növ hesabat verən general Quliyev dəmir yumruqlu liderimizin müharibəni necə bacarıqla idarə etməsindən həvəslə danışdı. Bu danışığı indi qalib ölkənin qalib Prezidentinin qalib generalının reallıq dolu ürək sözləri idi, desəm, qəti səhv etmərəm.Onun "Cənab Prezident nəinki mümkün olan hər şeyi etdi, hətta mümkün olmayan hər şeyi etdi ki, Azərbaycan bu şanlı qələbəni qazandı" -cümləsi İlham Əliyevin güclü xarici və daxili siyasətinə, uzaqgörən Heydər Əliyevdən miras qalmış dəyişməz siyasi kursuna verilən yığcam bir cavab idi.
DSX-nin şəxsi heyətinin Vətən müharibəsindəki rolu və xidməti tonqal başında xüsusi vurğulandı. Bildirildi ki, Azərbaycan-İran sərhədinin 132 kilometrlik hissəsinin, Fizuli, Cəbrayıl, Qubadlı, Zəngilan rayonlarının, Hadrut qəsəbəsinin, Şuşanın alınmasında DSX-nin hərbi qulluqçuları öz qətiyyətli sözlərini deyiblər. 24 saat ərzində105 km məsafəni düşməndən azad edən sərhədçilər Vətən müharibəsində silahdaşlarından 47 nəfəri şəhid verib. Həmkarlarımdan biri general Quliyevə şəhidlərimizlə bağlı sual ünvanlayanda DSX rəisi Vətən müharibəsində xüsusi şücaət göstərmiş sərhədçilərimizin Ali Baş Komandanımız İlham Əliyev tərəfindən müxtəlif təltiflərlə mükafatlandırıldığını dedi və şəhid sərhədçi əsgər, ölümündən sonra oxuduğu "Vətən yaxşıdır" mahnısı təsnifə dönən, bu ifası və qəhrəmanlığı ilə ölməzliyilə qovuşan Xudayar Yusifzadənin Prezidentin sərəncamı ilə "Azərbaycan Bayrağı" ordeninə layiq görülməsini çox yüksək dəyərləndirdi: "Döyüşdə Azərbaycan Bayrağı ordeni, bu çox yüksək təltifdir".
Xidmət rəhbəri şəhidlərlə bağlı qurumda müavini, general-leytenant Azad Ələkbərovun rəhbərliyi ilə xüsusi iş aparıldığını qiqqətə çatdıraraq söylədi ki, "bu - bizim şərəf borcumuzdur. Onlar unudula bilməz."
General Quliyev Zəngilanda tonqal başına yığışan həmkarlarıma 2011-ci ildə Qusarda dağ zastavasının açılışında"mənim skuter sürmək bacarığım"dan və "az qala sərhədçilərin yanında sərhədi pozaraq qonşu ölkəyə keçmək cəhd"imdən də danışdı.İndiyədək bilmirdim ,sən demə mən skuteri sürəndə əyləc əvəzinə sürət mexanizminin düyməsini basmışam.Nəticədə o uca Allah məni böyük xətadan qurtarıb düz 10 il bundan əvvəl.
Mən özümün və həmkarlarımın şahidi olduğu ilk qələbə tonqalından yazdım.Hesab edirəm ki,ürəyim dolu olsa da ,hamısını yaza bilmədim.Soyuq bir qış günündə isti tonqal başında metal əsgər fincanında ətirli çay içə-içə söhbətləşdiyimiz 5 yanvar gecəsinin tonqalı,Novruzun ilk bayram tonqalı idi.Neçə illər bayram tonqalına,Novruz tonqalına həsrət qalan bu doğma yurdumuzda ilk bayram tonqalını sərhədçilərimiz qaladılar.Ürəklə qaladılar ilk Qələbə tonqalını...İndi isə bütün ölkə boyu Qarabağlı Novruz tonqalları qalanmaqdadır.Mübarəkdir Qarabağlı Novruzumuz!Şəhidlərimizi hörmətlə anaraq deyirəm ki,30 illik Vətən həsrətinə,Vətən xiffətinə son qoyan Bahar bayramımız mübarəkdir,dostlar,cümlə Azərbaycan!!!
Aytəkin ALXASLI
