Tələbə Qəbulu üzrə Dövlət Komissiyası (TQDK) 9-cu siniflər üzrə sentyabrın 9-da keçirilmiş payız imtahanlarının nəticələrini açıqlayıb.
Payız imtahanında iyun ayında keçrilmiş buraxılış imtahanlarında iştirak edə bilməyənlər və ya imtahanda iştirak edib, bir və ya iki fəndən müvəffəq qiymət ala bilməyən 9-cu sinif şagirdləri iştirak ediblər. Payız imtahanında 28000-dən çox şagirdin iştirak edib.
Şagirdlərə hər bir fənn üzrə 30, ümumilikdə 60 test tapşırığı (30 riyaziyyat, 30 Azərbaycan dili) təqdim edilib. Bundan əlavə şagirdlərə təqdim edilmiş mövzu üzrə yazı işi də yerinə yetirilib.
TQDK bəyan edib ki, ümumi orta təhsil bazasında (9 illik ) keçirilmiş buraxılış imtahanında Ana dili və riyaziyyat fənlərinin hər biri üzrə ayrılıqda test tapşırıqlarına verdiyi düzgün cavablarının sayı 5-dən az olmayan şagirdlər müvafiq fənn üzrə müvəffəq qiymət alıblar.
Nəticələr TQDK-nın rəsmi internet saytında (//tqdk.gov.az/ortamekteb2012net9_p/) yerləşdirilib. Şagirdlər 7727 nömrəsinə SMS gondərməklə də öz nəticələrini öyrənə bilərlər.
Şagirdlərin fənlər üzrə düzgün cavablarının sayının 5 ballıq qiymət şkalasına (2,3,4,5) uyğunluğu aşağıdakı cədvəldə təqdim olunur:
| Qiymət | Fənlər üzrə düzgün cavabların sayı | ||
| Ana dili | Ana dili | Riyaziyyat | |
| 2 | 0-4 | 0-4 | 0-4 |
| 3 | 5-14 | 5-14 | 5-14 |
| 4 | 15-23 | 15-22 | 15-21 |
| 5 | 24-30 | 23-30 | 22-30 |
