Modern.az-a Milli Məclisin mətbuat xidmətindən məlumat verilib. İclası giriş sözü ilə açan komitə sədri Ziyad Səmədzadə yaz və növbədənkənar sessiyaları zamanı görülən işlər barədə məlumat verib. O, qeyd edib ki, rəhbəri olduğu komitə ötən dövrdə məhsuldar işləyibdir. Sessiyalar müddətində komitədə 40-a yaxın qanun layihəsi müzakirə olunubdur.
Komitə sədri payız sessiyasının qanunvericilik işləri planı barədə geniş söhbət açaraq deyib ki, qarşıdakı sessiya da gərgin iş qrafiki ilə seçilir. Daha sonra qeyd olunub ki, Azərbaycanın iqtisadi inkişafı üçün zəruri olan, rəqabət sahəsində ciddi yeniliklərə səbəb olacaq Rəqabət Məcəlləsi işlər planına daxildir. Qərara alınıb ki, bu sessiya çərçivəsində məcəllə üzərində işlər sürətləndirilsin və bu il başa çatdırılsın. Məcəllənin üçüncü oxunuşda müzakirəsinin komitənin payız sessiyasının gündəliyinə salındığı vurğulanıb.
Ziyad Səmədzadə həmçinin sessiya müddətində əvvəlcə 2013-cü ilin büdcə paketi müzakirə olunacağını, “Təhsil krediti haqqında”, “Ölçləmələrin vəhdətinin təmin edilməsi haqqında”, “Qiymətləndirmə haqqında” və “Kənd təsərrüfatının koorperasiyası haqqında” qanun layihələrinin parlamentin plenar iclasına təqdim ediləcəyini bildirib. Müzakirələrdən sonra komitənin iş qrafiki təsdiq olunub.
Sonra komitə üzvləri “Dövlət rüsumu haqqında”, “Daşınmaz əmlakın dövlət reyestri haqqında” qanunlarda dəyişikliklər edilməsi barədə layihələrdə texniki xarakterli dəyişikliklərə baxdılar.
Hər iki sənədin Milli Məclisin plenar sessiyasının müzakirəsinə çıxarılması qərar alınıb.
Anar RÜSTƏMOV
