Müsavat başqanı İsa Qəmbər deputat Gülər Əhmədova ilə bağlı yayılan videoqalmaqala yenidən münasibət bildirib. Modern.az-ın məlumatına görə, İsa Qəmbər Facebook sosial şəbəkəsində cəmiyyətdə böyük rezonans doğuran məsələyə toxunaraq bildirib ki, millət vəkili Gülər Əhmədovayla bağlı video cəmiyyətdə böyük partlayışa səbəb oldu.
Müsavat başqanının sözlərinə görə, məlum videomaterialın ölkə miqyasında böyük əks-səda doğurmasında sosial şəbəkələr mühüm rol oynayıb. İ.Qəmbər həmçinin vurğulayıb ki, sosial şəbəkələrdə sözügedən qalmaqalla bağlı aparılan müzakirələr ictimai fikri formalaşdırıb və konkret nəticələr verməyə başlayıb.
Qeyd edək ki, deputat Gülər Əhmədovayla bağlı məsələ Milli Məclisin sabahki iclasında müzakirəyə çıxarılaraq onun toxunulmazlıq hüququnun götürməsi və deputat mandatının ləğv edilməsi haqda yekun qərar veriləcək.
A.RÜSTƏMOV
