Millət vəkilləri bazar günü Ukraynada keçiriləcək parlament seçkilərini izləyəcəklər
“Biz bu yaxınlarda Belarusda parlament seçkilərini izlədik, indi isə bir qrup millət vəkili ayın 27-də Ukraynaya parlament seçkilərini müşahidə etmək üçün gedirik”. Bunu jurnalistlərə açıqlamasında Azərbaycanın ATƏT Parlament Assambleyasındakı (PA) nümayəndə heyətinin üzvü, Milli Məclisin (MM) Aqrar siyasət komitəsinin sədri Eldar İbrahimov dilə gətirib.
“Mən həm Azərbaycan-Ukrayna parlamentlərarası Dostluq Qrupunun rəhbəri, həm də ATƏT PA-nın üzvü kimi seçkiləri izləmək üçük Ukraynaya gedirəm, eyni zamanda, ATƏT PA-dakı nümayəndə heyətimizin üzvü, həmkarım Azay Quliyev də seçkiləri izləmək üçün Ukraynaya gedəcək”- deyən E.İbrahimovun sözlərinə görə, MDB Parlament Assambleyasının (PA) xətt ilə isə birinci vitse-spiker Ziyafət Əsgərovun rəhbərlik etdiyi nümayəndə heyəti- millət vəkili Siyavuş Novruzov və başqa bir neçə şəxs Ukraynadakı seçkiləri müşahidə etmək üçün bu ölkəyə səfər edəcək.
Millət vəkili hesab edir ki, Belarusda olduğu kimi, Ukraynada da bu seçkilər çox güman sakit, rahat keçəcək, insanlar gəlib öz səsini istədikləri namizədlərə verəcək: “Kimi deputat seçəcəklər, o, Ukrayna xalqının öz işidir, onların istəyidir ,kimi deputat görmək istəyirlər, hansı partiyaya daha çox səs vermək istəyirlər, onların öz işləridir”.
Bununla yanaşı, E.İbrahimov qeyd edib ki, onun qənaətincə, Ukrayna prezidenti Viktor Yanukoviçin lider olduğu Regionlar Partiyası budəfəki parlament seçkilərində də qalib gələcək: “Şəxsən mən yüzdəyüz bu, qənaətdəyəm. Çünki iki dəfə - elə bu yaxınlarda da- həmin partiyanın qurultayında olmuşam, orada olan ab-havanı ki, görürəm, bəli, o partiyanın seçkilərdə birinci olmasına heç bir şəkk-şübhə yoxdur. Hətta, Yuşenko prezident , Timoşenko baş nazir olanda da yenə Yanukoviçin partiyası qalib gəldi, birinci yerə çıxdı. Onlar isə ikinci, üçüncü yerə çıxdılar. Yəni, bu partiyanın potensialı çox böyükdür”.
Modern.az
