İctimai Palatanın prezident seçkilərinə 4-5 namizədi ola bilər | Modern.az

Noyabrın 3-də Müsavat Partiyasının qərargahında İctimai Palatanın növbəti sessiyası keçirilib. Modern.az musavat.com-a istinadən bildirir ki, sessiyaya sədrlik edən Pənah Hüseyn məlumat verib ki, gündəlik layihəsinə ölkədə ictimai-siyasi vəziyyətin müzakirəsi, İP-in vəzifələri və cari məsələlər daxil edilib.

Ərəstun Oruclu və Yadigar Sadıqlı hələ İP-dən getməyib

Daha sonra dönəm sədri Ədalət Yusubov son iki ayda İP-in gördüyü işlər barədə məlumat verib.  
Daha sonra tədbir iştirakçıları Ədalət Yusubova iki aylıq dönəm sədrliyi zamanı səsləndirdiyi hesabatla bağlı suallar ünvanlayıblar. Onlar İP üzvləri Ərəstun Oruclu və Yadigar Sadıqlının istefa verməsi ilə bağlı müzakirələrin aparılması təkliflini irəli sürüblər. Sessiya sədri P.Hüseyn bildirib ki, həmin şəxlər İP-dən getmələri ilə bağlı rəsmi ərizə ilə hələ də müraciət etməyiblər.

Əli Kərimli: “Artıq vahid seçki platformasını işləyib hazırlamışıq”

İP KŞ üzvü, AXCP sədri Əli Kərimli çıxışı zamanı siyasi məsələlərlə bağlı gündəmi dəyərləndirib. ”Son iki ayda Azərbaycan hakimiyyətinin bp ilə, Avropa Şurası və Rusiya ilə münasibətlərində gərginlik yaranıb” deyən Ə. Kərimli Gürcüstanda keçirilən demokratik seçkiləri də dəyərləndirib. O, daha sonra bildirib ki, Rusiyada yaşayan oliqarxlar bir araya gəlib yeni bir təşkilat formalaşdırıblar: “Onlar hələ də mövqelərini açıqlamayıblar. Bu təşkilatın fəaliyyətinə münasibət bildirməkdə tələsməməliyik. Hakimiyyət daxilində milyarderlərin bir araya gəlməsinə qarşı kampaniyaya start verib...
...Bütün güclər İP-in işlərinin gücləndirilməsinə yönləndirilməlidir. Artıq biz vahid seçki platformasını işləyib hazırlamışıq. Bunun özü İP-in fəaliyyətinə dönüş nöqtəsi olacaq”.
Ə.Kərimli deyib ki, 2013-cü ildə qədər seçki islahatlarına nail olunmalıdır. “Bizim bununla bağlı layihə və təkliflərimiz var. Azərbaycanın tanınmış hüquqşunasları, seçki mütəxəsissləri seçki islahatları ilə bağlı təkliflərini hazırlayıb ictimaiyyətə təqdim etdilər. Biz növbəti sessiyada onların təkliflərini müzakirəyə çıxaracağıq”.

İP KŞ üzvü Vidadi Mirkamal çıxışı zamanı İP-in ötən aydakı fəaliyyətinə toxunub:
“İP-in əsas zərbə qüvvəsi olan komissiyaların işi daha möhkəm şəkildə təşkil olunmalıdır. Dövrün tələblərinə uyğun olaraq biz 2013-cü ilə necə gedəcəyimizi düşünməliyik. İP-in iclaslarında mütəmadı olaraq 120 nəfər iştirak edir. Yerdə qalan üzvlərimizin çoxu adını yazdırıb iclasda iştirak etmədən gedirlər. Onlar hər sessiyada iştirak etməli, siyasi proselərə öz münasibətlərini bildirməlidirlər. Koordinasiya Şurasının indiki fəaliyyəti ilə bağlı olduqca narazıyam. Onun səmərəliliyi və faydalılığı çox aşağıdır. KŞ üzvləri var ki, aylarla iclasa gəlmirlər. Onlar fəaliyyətləri ilə bağlı açıq hesabat verməlidirlər”.

V.Mirkamal bildirib ki, İP-in növbəti hədəfi prezident seçkiləridir və buna vahid seçki platforması və qərargah yaratmaqla nail olacaq: “Vacib deyil ki, İP-in mütləq bir namizədi olmalıdır. İP-in prezident seçkilərinə 4-5 namizədi də ola bilər”.

Arif Hacılı: “Vicdan məhbuslarının müdafiəsi  ilə bağlı işlər səngiyib”

Çıxış edən İP üzvü Mustafa Hacıbəyli Azərbaycanda demokratik dəyişikliklərə nail olmaq məqsədi ilə siyasi mübarizənin gücləndirilməsi haqqında İctimai Palataya layihə təqdim edib.

Müsavat İcra Aparatının rəhbəri Arif Hacılı bildirib ki, həbsdə olan vicdan məhbusları ilə bağlı, onların müdafiəsinin təşkil olunması ilə bağlı işlər səngiyib. O, bu istiqamətdə təkliflər irəli sürüb.

Müsavat tək də seçkiyə gedə bilər

Müsavat Gənclər Təşkilatının sədri Tural Abbaslı və Əhəd Məmmədli çıxışı zamanı bildiriblər ki, İP fəaliyyət istiqamətini yenidən gözdən keçirməlidir: “Ölkənin ana müxalifət partiyası sayılan Müsavat Partiyası bütün gücünü İP-in fəaliyyətinə sərf edib. Biz Müsavat olaraq da 2013-ə gedə bilərik və buna gücümüz də var. Biz güclərimizin bərabər şəkildə paylanmasının tərəfdarıyıq”.

Sessiya çıxışlarla bağlı yaranan sualların müzakirə olunması ilə bağlı davam etdirilib.