İlyas İsmayılov: “Cəza dövlətin gəlir mənbəyi olmamalıdır”
“Hesab edirəm ki, o miqdarda cərimə təyin etmək olmaz. Bu, qətiyyən düzgün deyil”. Bu sözləri Modern.az-a açıqlamasında sərbəst toplaşmaq azadlığı ilə bağlı tətbiq olunan cərimələrin artırılması məsələsini şərh edərkən eks-ədliyyə naziri, millət vəkili İlyas İsmayılov deyib:
“Qadağalar metodu düz deyil”
Millət vəkilinin sözlərinə görə, hüquqi dövlət qurmaq istəyiriksə, məcburetmələrdən qaçmalıyıq. “Hüquqi dövlətdə də insanlara məcburetmə, qadağa metodları yox, əsasən inandırma, həvəsləndirmə və icazə metodu tətbiq edərlər. Cəriməni də o qədər artırmaq, cəzanın məqsədinə uyğun deyil” .
“Tutalım ki, 2000 adam mitinqə çıxdı...”
Millət vəkilinin sözlərinə görə, cəza insanları tərbiyə etmək üçündür. Bu, dövlətin gəlir mənbəyi olmamalıdır. “Praktiki baxımdan da bu mümkün olan bir məsələ deyil. Tutalım ki, 2000 adam mitinqə çıxdı. Onları bu qədər məbləğdə necə cərimələmək olar? Bu, insanların Konstitusiya hüququdur. İnsanlar bu hüquqlardan istifadə etməlidirlər. Ancaq müəyyən məsələləri qadağan etmək olar, cərimə sanksiyası isə düzgün deyil “-deyə deputat bildirib.
X.SƏFƏROĞLU
