...Dünən Özbəkistanın Daşkənd şəhərindəki səfirliyimizdə də Azərbaycan dövlətinin möhtəşəm Bayraq günü möhtəşəm şəkildə qeyd olundu. Bir neçə illər bundan fərqli olaraq, artıq Daşkənddəki azərbaycanlılar və qeyri millətlər Daşkənddə Heydər Əliyev adına gözəl bir mədəniyyət Mərkəzinin olmasından xəbərdardılar. Çünki 8 ilə yaxındır ki, burada Azərbaycanın bütün bayramları, tədbirləri, xatirə günləri çox geniş miqyasda keçirilir. Bu bayramların keçirilməsi, mədəniyyət evində Azərbaycanın qədim və bugünkü tarixi muzeylərinin yaradılması-bunların hamısı Azərbaycan dövlətini Özbəkistanda layiqincə təmsil edən noyabr ayının 1-nə kimi Azərbaycanın fövqəladə və səlahiyyətli səfiri işləmiş Namiq Abbasovun uğurudur.
dünən də Dövlət Bayrağı günümüzdə həmişəki kimi Mədəniyyət evində xüsusi bir coşqu var idi. Bayram tədbirinə gələn azərbaycanlılar və qeyri-millətin nümayəndələri özləri ilə uşaqlarını və nəvələrini gətirmişdilər. Gətirmişdilər ki, o bayrağın hansı mübarizələr nəticəsində ucalarda dalğalanmasından xəbərləri olsun.
... Azərbaycan himni səsləndi. Bu dəfə balaca uşaqlar da əllərini ürəyinin üstünə qoymuşdular. Çox qürurverici bir an idi. Sonra üçrəngli bayrağımızın ucalarda dalğalanması uğrunda canından keçən şəhidlərimizin ruhu bir dəqiqəlik sükutla yad edildi. Sonra isə Azərbaycanın noyabr ayının 1-nə kimi Özbəkistanda fövqəladə və səlahiyyətli səfiri olan Namiq Abbasov çıxış etdi. Əvvəlcə dedi ki, bu gözəl Bayraq günündə Azərbaycan diasporu ilə görüşüb vidalaşmaq üçün gözəl bir fürsət oldu. Sonra isə üçrəngli bayrağımızdan danışdı:
“...Bayramınızı təbrik eləmək üçün gəlmişəm. Bayramınız mübarək olsun, əzizlərim! Arzu edirəm ki, bundan da xoş, Azərbaycanın başının daha da uca anları ilə əlamətdar olan bayramların iştirakçısı olasınız. Bayraq bütün dövlət formalarında ən sədaqətli, dövlətçilik yolunda hər an həyatından keçməyə hazır olan cəsur insanlara etibar olunurdu. Bayraqdar o adam idi ki, son nəfəsinə qədər o bayrağı əlində və mümkün qədər uca tutmağa gücü catsın. Vaxtilə bizim Azərbaycanın ərazisi 400 min kvadrat kilometrdən ibarət olub. 1918-ci ildə ilk Azərbaycan Demokratik Respublikası yarananda onda bizim 114 min kvadrat kilometr ərazimiz var idi. Demokratik quruluş süquta yetəndən sonra 86 min kvadrat kilometrdə dayandı. .. Dövlət bayrağı bayramı bütün Azərbaycan xalqının ən böyük bayramlarından biridir. Hər bir azərbaycanlının arzusu o möhtəşən dövlət bayrağını Xankəndidə, Şuşada dalğalanmasını görməkdir. Mənim bu gün burda bu qədər əziz adamım var, bir daha onların qarşısında ürəyimin sözünü demək istəyirəm ki, ömrünün son gününə qədər Azərbaycan bayrağının o torpaqlarda dalğalanması üçün, canımdan belə keçməyə hazıram. Mən indi sabiq səfirəm, ən xoş arzularla bu xalqdan, bizim 40 mindən artıq Azərbaycanlıya çörək və sığınaq vermış bu ölkədən və sizdən böyük minnətdarlıqla ayrılıram”.
Özbəkistandakı həmyerlilərimiz bir möhtəşəm bayramı da beləcə qeyd etdilər. 8 il bundan öncə ilə fərq ondan ibarət idi ki, Azərbaycan dövlətinin diplomatı Namiq Abbasov bü ölkədə yaşayan həmyerlilərimizə tarixi Vətənimiz, onun hüdudları, onun varlığı və gücü haqqında çox şey öyrətdi. İndi burdakı azərbaycanlı həmyerlilərimizin böyük əksəriyyətinin evində Azərbaycan bayrağı var. Azərbaycan Respublikasında baş verən hadisələri, informasiya axınını izləmək üçün çanaq antennaları var. Bir qayda olaraq o, Azərbaycan dövlətinin müxtəlif bayram və tədbirlərində fərqlənən Azərbaycan diasporunun üzvlərinə çanaq antennaları hədiyyə etdi, bu da qəriblikdə yaşayan həmyerlilərimizin, Vətəndən xəbərdar olmaları üçün təbliğatın bir növü idi. Onun yaddaşlarda qalan çox xidmətləri oldu.... Bunu isə Özbəkistanda yaşayan, Ana Vətənimiz Azərbaycanı sevən hər bir azərbaycanlı bilir və xatırlayacaqlar.
Modern.az üçün
Aida Eyvazlı,
Azərbaycan Televiziya və Radio Verilişləri QSC-nin
Özbəkistan Respublikası və Mərkəzi Asiya üzrə
müxbir postunun rəhbəri
