“Qəbul edilməsi gözlənilən Amnistiya aktı 15 mindən çox məhbus və müxtəlif formalarda cəza almış şəxsi əhatə edə bilər”.
Bunu Modern.az-a 8 Noyabr Zəfər Günü ilə bağlı təklifi nəzərdə tutulan Amnistiya aktı haqqında danışarkən Konstitusiya Araşdırmaları Fondunun rəhbəri Əliməmməd Nuriyev deyib. O söyləyib ki, həmin 15 min insandan əlavə, pandemiyaya görə cərimə və cəza almış şəxslərin bağışlanması də bura daxil edilə bilər:
“Sonuncu Amnistiya aktı vitse-prezident Mehriban xanım Əliyevanın təşəbbüsü ilə Milli Məclis tərəfindən 2016-cı ildə qəbul edilib. Beləliklə, 5 ildir, amnistiya verilməsinin şahidi olmamışıq. Halbuki əvvəlki Amnistiya aktlarının 3-4, hətta 2 il fasilə ilə qəbul edildiyini bilirik. Həm sonuncu Amnistiyadan bu qədər uzun müddət keçməsi, həm də Zəfər Günü kimi çox əhəmiyyətli hadisənin bir illiyi münasibətilə qəbulunun planlaşdırılması daha çox insanı əhatə edəcəyini söyləməyə də əsas verir.
Vətən Müharibəsində qazandığımız qələbə son 200 ildə ilk dəfə baş verən və möhtəşəm tarixi əhəmiyyətə malik hadisədir. Bu, erməni faşizmi üzərində qələbə olmaqla qlobal vacibliyi ilə də fərqlənir. Ona görə, gözlənilən amnistiya əvvəlkilərdən daha əhatəli və fərqli olmalıdır.
Sözsüz ki, əvvəlki Amnistiya aktlarında olduğu kimi, ictimai təhlükə törətmək ehtimalı olan, ağır cinayətə görə cəza almış, terror, narkotik alveri, dövlətə xəyanət və s. kimi məsələlərdə əli olan şəxslərə bu bağışlanma aid edilə bilməz. Aktı hazırlayacaq qrupun bununla bağlı peşəkarlığına şübhəm yoxdur”.
Hüquq müdafiəçisi düşünür ki, pandemiya qaydalarının pozulmasına görə cəza almış şəxslərin cəzasının ləğvi üçün Amnistiya Aktına əlavə fəsil salına bilər:
“Qanunvericilik buna imkan verir. İnsanlar onsuz da pandemiya şəraitində yaşamağa öyrəşiblər, qaydalar nisbətən yumşaldılıb, cəzaların çox hissəsi ödənilib. Ona görə pandemiya qaydalarını pozan şəxslərin cəzalarının ləğvi barədə Amnistiya aktına əlavə edilə bilər. Bu zaman aktın daha çox insanı əhatə edəcəyi də mütləqdir”.
