Misir prezidenti Məhəmməd Mursi tərəfdarları və müxaliflər arasında iğtişaş baş vermiş küçəyə 3 tank yerləşdirilib. Modern.az ərəb KİV-lərinə istinadən bildirir ki, bundan əlavə, iki zirehli hərbi daşıyıcı da prezident sarayı ətrafına gətirilib. Çərşənbə günündən başlamış iğtişaşlar cümə axşamının ilk saatlarına qədər davam edib.
“Əl-Əhram” qəzetinin Səhiyyə Nazirliyinə istinadən verdiyi məlumatına görə, prezident sarayı ətrafında baş vermiş iğtişaşlarda 6 nəfər ölüb, 450 nəfər isə yaralanıb.
Heliopolis bölgəsindəki xəstəxanalara səhərə qədər yaralıları gətirməyə davam ediblər.
“Əl-Faqr” qəzetininin jurnalisti Əl-Hüseyni Əbul-Dayf iğtişaşlarda ağır yaralananlar arasında olub. Zəhra xəstəxanasının həkimləri Əbul Dayfın kliniki ölüm vəziyyətində olduğünü bildiriblər.
