“Google maps” tətbiqində Azərbaycanın Qarabağ bölgəsinin adlarının rəsmi adları ilə Azərbaycan dilində göstərilməsi ilə yanaşı, saxta adlarla erməni dilində göstərilməsi məsələsi rəsmi diplomatik kanallarla “Google” şirkəti qarşısında qaldırılıb. Azərbaycanın ərazilərinin adlarının təhrif edilməsi ilə bağlı şirkət rəhbərliyinə məktub ünvanlanıb və ölkəmizin müvafiq ərazilərinin rəsmi coğrafi adlarının siyahısı qarşı tərəfə təqdib edilib.
BMT-nin Coğrafi adların Standartlaşdırılması üzrə Konfransları çərçivəsində qəbul edilmiş qətnamələrə görə hər hansı bir dövlətin səlahiyyətli dövlət qurumu tərəfindən standartlaşdırılmış coğrafi adlara dəyişiklik edilməsi yolverilməzdir və bu kimi dəyişikliklər BMT tərəfindən tanına bilməz.
Xarici İşlər Nazirliyinin Mətbuat xidməti idarəsinin rəisi Leyla Abdullayeva açıqlamasında bildirib ki, “Google maps” platforması istifadəçilərin fərdi müraciətləri və yanaşmaları prinsipi əsasında fəaliyyət göstərir:
“Bu baxımdan vətəndaşlarımızın, habelə qeyri-hökumət qurumlarının mövzu ilə bağlı fəal şəkildə fikirlərini şirkətə yazmaları çox önəmlidir”.
Şimali Karolina ştatının Roli şəhərində fəaliyyət göstərən Azərbaycan Dostluq Təşkilatının rəhbəri Adika İqbal Modern.az-a açıqlamasında bildirib ki, bununla bağlı müraciətlər olunur:
“Bu köhnə problemdir. On il bundan qabaq da bu mövzuda mübarizə aparmışıq. Google dünyanın hər yerində azlıqlar yaşayan şəhər və kənd adlarını ikinci dildə yazır. Sadəcə bizə gəldikdə, bu ərazilərə başqa cür baxılır. “Google” adlarını redaktorlar dəyişir və orada ermənilər çoxdur. Konqresmenlərə məktub göndərməyin mənası yoxdur, onların səlahiyyətində olan bir şey deyil. Bunu dövlət səviyyəsində həll etmək lazımdır. İnanıram ki, bununa məsələ həll oluna bilər”.
