“Qatarlarda gediş-gəliş pulsuz olacaq. 20 Yanvar faciəsi zamanı şəhid olan və yaralanan dəmiryolçuların ailə üzvlərinə maddi yardımlar ediləcək”. Bu barədə Modern.az-a “Azərbaycan Dəmir Yolları” QSC-nin mətbuat xidmətinin rəhbəri Nadir Əzməmmədov məlumat verib. O bildirib ki, 20 Yanvar faciəsinin 23-cü ildönümü ilə əlaqədar “Azərbaycan Dəmir Yolları” QSC-də tədbirlər planı hazırlanıb. QSC sözçüsünün dediyinə görə, tədbirlər planına əsasən, Bakıda şəhərətrafı zonada 20 yanvar günü saat 06:00-dan 23:00-dək hərəkət edən elektrik qatarlarında gediş-gəlişin pulsuz təşkili həyata keçiriləcək.
Yanvarın 20-də saat 12:00-da anım dəqiqəsində qatarların hərəkəti dayandırılacaq, lokomotivlər həyəcan fiti verəcəklər.
Bundan başqa, Nadir Əzməmmədov onu da bildirib ki, QSC-nin müəssisə və təşkilatlarında 20 Yanvar faciəsinin 23-cü ildönümü ilə bağlı anım tədbirləri keçiriləcək, faciə zamanı şəhid olan və yaralanan dəmiryolçuların ailə üzvlərinə maddi yardımlar ediləcək, “Azərbaycan Dəmir Yolları”nın kollektivi Şəhidlər Xiyabanını ziyarət edəcək.
Gültəkin Ələsgər
