Qazaxıstanın daxili işlər naziri Yerlan Turqumbayev tutduğu vəzifədən azad edilib.
Modern.az Qazaxıstan KİV-lərinə istinadən xəbər verir ki, bu barədə prezident Kasım-Jomart Tokayev müvafiq sərəncam imzalayıb.
“Dövlət başçısının sərəncamı ilə Turqumbaev Yerlan Zamanbekoviç Qazaxıstan Respublikasının daxili işlər naziri vəzifəsindən azad edilib”, - məlumatda deyilir.
Digər sərəncamla Yerlan Turqumbaev prezidentin müşaviri təyin olunub.
Polis general-leytenantı Yerlan Turqumbayevin bu il 60 yaşı tamam olur. O, 1984-cü ildən Daxili İşlər Nazirliyinin orqanlarında işləyir. Bu illər ərzində o, Şimali Qazaxıstan vilayətinin, Almatı polisinin rəisi, İstintaq Komitəsinin sədri olub.
2012-ci ildən - daxili işlər nazirinin müavini postunu tutub, 2019-cu ildən Qazaxıstan Respublikasının daxili işlər naziri idi.
