“Seçki Məcəlləsində dəyişikliklərə ehtiyac var. Mərkəzi Seçki Komissiyasının qurulması prinsipinə yenidən baxılmalıdır. Həmçinin ATƏT-in Venesiya Komissiyası ilə əməkdaşlıq genişləndirilməlidir”. Bu sözləri Modern.az-a açıqlamasında politoloq Qabil Hüseynli AŞPA-nın qış sessiyasında bu gün Azərbaycanın ünvanına səsləndirilən tənqidləri şərh edərkən deyib.
Politoloqun sözlərinə görə, Azərbaycan Avropa Şurasına daxil olarkən öz üzərinə müəyyən öhdəliklər götürüb. Buraya əsasən azad, şəffaf, demokratik seçkilərin keçirilməsi daxildir. Bu istiqamətdə müəyyən müsbət addımlar atılıb. Q. Hüseynli qeyd edib ki, müəyyən nəticələr əldə olunsa da, görüləsi işlər çoxdur. Eyni zamanda Avropa Şurasının tənqidlərinin və iradlarının sadəcə tövsiyə və məsləhət xarakteri daşıdığını qeyd edən politoloqun fikrincə, Azərbaycan bunların bir qisminin dəyişdirilməsi istiqamətində siyasət yürütməlidir.
