“Əlaqələr də müəyyən soyuqluq olsa da, Rusiyadan bizim üçün təhlükə gözlənilmir. Bu rəylər camaatı çaşdırmaq üçün ortaya atılır. Məqsədləri qeyri-stabillik yaratmaqdır”. Bu fikiri Modern.az-a açıqlamasında ASDP sədri Araz Əlizadə “Rusiya təhlükəsi” barədə səslənən politoloji rəyləri şərh edərkən deyib.
Onun sözlərinə görə, bu sadəcə olaraq siyasi manevrdir.
“1990-cı illəri xatırlatmaq yerinə düşər. O vaxt Ayaz Mütəllibov hakimiyyəti zamanı Qarabağda vəziyyətin gərginliyindən istifadə edən AXC üzvləri buna sevinir və panika yaradırdılar. Əsas məqsədləri hakimiyyətə gəlmək idi. İndi də həmin taktikalardan istifadə edirlər. Rusiya qorxusu ilə əhalinin ürəyinə xof salmaq, insanlarda həyəcan yaratmaq istəyirlər. Ancaq onların bütün cəhdləri boşa çıxacaq. Həmin insanlar bir daha hakimiyyətə gəlməyəcəklər”-deyə vurğulayıb.
Qeyd edək ki, 2013-cü ili seçki ili olduğunu nəzərə alaraq Rusiyanın Azərbaycanın siyasi həyatına təsirləri ilə bağlı ciddi rəylər açıqlanır.
Aqşin Kərimov
