Bu gün Azərbaycanın ilk suni peyki orbitə buraxılır. “Azerspace-1” adlanan ilk peyk Cənubi Amerikada yerləşən Fransa Qvianası Kosmik Mərkəzinin Kuru kosmodromundan “Ariane Space” şirkətinin (Fransa) raket daşıyıcısı vasitəsilə qaldırılacaq və geostasionar orbitə çıxarılacaq.
“İlk suni peykin orbitə buraxılması bağlı bu saata kimi hələ bir problem yoxdur”. Bu sözləri Modern.az saytına açıqlamasında Rabitə və İnformasiya Texnologiyaları Nazirliyinin mətbuat xidmətinin rəhbəri Müşfiq Əmirov bildirib. O qeyd edib ki, peyk fevralın 7-dən 8-ə keçən gecə orbitə buraxılacaq. O, peykin dəqiq hansı saatda buraxılması barədə məlumatsız olduğunu əlavə edib.
Milli Məclisin Təbii ehtiyatlar, energetika və ekologiya komitəsinin üzvi, millət vəkili Fuad Muradov isə ilk milli suni peykin orbitə çıxarılmasını böyük hadisə kimi qiymətləndirir.
“Bu il bildiyiniz kimi 2013-cü il prezidentimiz tərəfindən “İKT ili” elan edilib. Müstəqillik ili çox olan ölkələrin əksəriyyətinin hələ peykləri yoxdur. Amma Azərbaycanın yeni müstəqillik qazanmış bir ölkə olaraq peykini orbitə buraxması çox böyük hadisədir. Düşünürəm ki, bu, vətəndaşların gündəlik həyatına təsir göstərəcək, ilk olaraq elektron xidmətlər, internet sürəti, keyfiyyətli televiziya və radio xidmətlərindən istifadə etməyə şərait yaradacaq”.
F.Muradov bu günkü olayın Azərbaycan tarixinə yazılan bir hadisə kimi qiymətləndirib.
“Mütəqil Azərbaycanın öz peyki olacaq. Bununla da kifayətlənməyəcəyik, cənab prezidentimiz qeyd etdiyi kimi, bu texonologiyaları inkişaf etdirəcəyik və yeni peyklərimiz də orbitə buraxılacaq”.
Qeyd edək ki, Peyk Fransız Qvianasında Kur kosmodromundan “Ariane-5” kosmik daşıyıcısı ilə orbitə çıxarılacaq. Azərbaycanın ilk rabitə peykin ümumi çəkisi 3250 kq təşkil edir. Peyk 36 aktiv C və Ku siqnal transponderlərə malik olacaq. Peykin orbitdəki yeri isə Şərq istiqamətində 46 dərəcə olacaq. Peykin imkanlarının 20%-i Azərbaycanın tələbatını ödəmək üçün, qalan 80%-i isə kommersiya məqsədilə istifadə ediləcək.
Aytən ƏLİYEVA
