Bu gün Azərbaycanın Milli Qəhrəmanı Mübariz İbrahimovun doğum günüdür. Modern.az saytının məlumatına görə, qəhrəmanın bir müddət öncə hazırlanan heykəli Azərbaycan Rəssamlıq Akademiyasında qalmaqdadır.
Mübariz İbrahimovun heykəlini hazırlayan heykəltəraşı oxuculara təqdim etmişdik. Gənc heykəltəraş bir neçə ay öncə bildirmişdi ki, Tovuz Rayon İcra Hakimiyyətinin başçısı abidənin bu şəhərdə ucaldılması üçün ona müraciət edib. Amma sonradan icra başçısından səs-soraq çıxmayıb.
Bir sözlə, Milli Qəhrəmanın heykəlinə hələ sahib çıxan tapılmır.
Heykəli hazırlayan Vüqar İmanquliyev Modern.az-a açıqlamasında bildirib ki, hazırda heykəl akademiyadadır və oradan çıxarıb üzərində müəyyən qədər restavrasiya işləri aparacaq. Gənc heykəltəraşın sözlərinə görə, Milli Qəhrəmanın heykəlini təmirdən sonra Tovuz rayonuna hədiyyə edəcək.
“Heykəlin üzərində müəyyən işlər aparacam. Havanın istiləşməsini gözləyirəm. Bir aydan sonra restavrasiya işlərini yekunlaşdırıb, Tovuz rayonuna hədiyyə edəcəm”
Milli Qəhrəman Mübariz İbrahimov 1988-ci il fevralın 7-də Biləsuvar rayonunun Əliabad kəndində anadan olub. 2005-ci ildə orada orta təhsilini başa vurub. Əsgəri xidmətini Daxili Qoşunların "N" saylı hərbi hissəsinin Xüsusi Təyinatlı Bölüyündə keçirib. 2009-cu ilin avqust ayında yenidən gizir rütbəsində hərbi xidmətə başlayıb. Bir müddət sonra öz arzusu ilə cəbhə bölgəsindəki hərbi hissələrdən birində xidmət etməyə başlayıb.
19 iyun 2010-cu il tarixində gecə saat 23:30 radələrində gizir Mübariz İbrahimov təkbaşına iki ordu arasındakı bir kilometrlik minalanmış sahəni keçərək erməni səngərinə hücum edib. Düşməni ağır itkilərə məruz qoyan Azərbaycan döyüşçüsü səhər saatlarında qeyri-bərabər döyüşdə qəhrəmancasına həlak olub. 19 iyun 2010-cu il tarixində Tərtər rayonun Çaylı kəndi yaxınlığında şəhid olub. Ölümündən sonra ona Milli Qəhrəman adı verilib.
Anar Kəlbiyev