“Son günlər İşçi Qrupunun avtobus sürücüləri arasında nizam-intizamın yaradılması məqsədilə keçirdiyi tədbirlərdə 46 avtobus müvəqqəti mühafizə olunan dayanacağa qoyulub”.
Bunu Modern.az-a açıqlamasında Bakı Şəhər Dövlət Yol Polisi İdarəsinin İctimaiyyətlə əlaqələr şöbəsinin rəisi Vaqif Əsədov deyib. Şöbə rəisinin sözlərinə görə, 4 sərxoş halda avtobusu idarə edən sürücü də bu reydlər zamanı saxlanıb.
“Sürücülük vəsiqəsi, texniki pasport, vəkalətnamə və digər sənədlər olmadığı üçün avtobuslar müvəqqəti mühafizə olunan dayanacağa aparılıb. İşçi qrupunun son bir həftə ərzində keçirdiyi reyd zamanı, yanacaqdoldurma stansiyasına sərnişinlərlə dolu girdiyi üçün – 4, işıqforun qırmızı işığında hərəkət etdiyi üçün – 16, yolun hərəkət hissəsində, ikinci cərgədə dayanacaqdan kənarda avtobusu saxlayıb sərnişinlərin düşüb-minməsini təmin etdiyi üçün – 98, qoşa bütöv xəttin tələbini pozaraq əks istiqamətdə yol zolağına daxil olan – 29 və yol ayrıcını keçmə qaydalarını pozduğu üçün – 61 sürücüyə inzibati protokol tərtib edilib. Bundan başqa taksi fəaliyyəti ilə məşğul olub avtobus dayanacaqlarını qeyri-qanuni zəbt edən sürücülərə də protokol yazılıb. Bunlar 58 taksi sürücüsüdür. Bunlardan 6 nəfəri təkrar qeydə düşüb”.
V.Əsədov avtobus sürücüləri arasında nizam-intizamın yarandığı günə qədər bu reydlərin davam etdiriləcəyini deyib. BŞDYPİ-nin şöbə rəisi bildirib ki, bu il başlayandan Bakı şəhərində avtobus sürücülərinin iştirakı ilə 15 yol-nəqliyyat hadisəsi qeydə alınıb, 6 nəfər ölüb, 22 nəfər isə yaralanıb.
“Bu qəzalar sırf avtobus sürücülərinin iştirakı ilə baş verib. Bunlar ilin əvvəlindən bu günə kimi baş verən qəzalardır. Yol hərəkətində təhlükəsizliyin təmin edilməsi, yol-nəqliyyat hadisələrinin sayının aşağı salınması məqsədilə Bakı Şəhər Dövlət Yol Polisi İdarəsi rəisinin göstərişinə əsasən xüsusi işçi qrupu yaradılıb, bu İşçi Qrupu gün ərzində, hətta gecənin qaranlıq vaxtı belə xüsusi reydlər keçirir. Gecə vaxtı sərxoş vəziyyətdə avtomobilləri idarə edən sürücülərin aşkar edilməsi, gündüzlər isə hal-hazırda ictimai nəqliyyat vasitələrini idarə edən sürücülər arasında nizam-intizamın yaradılması məqsədilə bu reydləri təmin edir. Paralel olaraq gün ərzində paytaxt ərazisindəki yeraltı və yerüstü piyada keçidlərinin yaxınlığında təyin olunmayan yerlərdən keçən piyadaların aşkarlanması məqsədilə reyd keçirilir və qaydanı pozan piyadalara protokollar tərtib edilir. Son bir həftə ərzində İşçi Qrupu 300 piyadaya protokolun yazılmasını təmin edib”.
Anar Kəlbiyev
