Ermənistan Rusiya qazına görə ödənişləri rublla həyata keçirir.
Modern.az xəbər verir ki, bu barədə RBC-yə ölkənin iqtisadiyyat naziri Vaan Kerobyan məlumat verib.
Nazir qeyd edib ki, qiymətlər dollarla hesablanır, lakin ödəniş rublla edilir.
“Qazprom”un rəsmi nümayəndəsi Sergey Kupriyanov məlumatı təsdiqləyib: “Həqiqətən də, “Qazprom”un Ermənistana qaz tədarükü üzrə müqavilə qazın pulunu rublla ödəməyə imkan verir və bu imkandan istifadə olunur”.
Ermənistan baş nazirinin müavini Mher Qriqoryan qeyd edib ki, İrəvan Rusiyaya qarşı sanksiyaları dəstəkləməyib, lakin qazın rublla tədarükü ilə bağlı danışıqlar martın 23-dən aparılır.
Xatırladaq ki, martın 31-də Rusiya prezidenti Vladimir Putin qeyri-dost ölkələrə qaz tədarükünə görə ödənişin yeni qaydasını müəyyən edən fərman imzalayıb. Fərmana əsasən qaz satışı rublla həyata keçirilməlidir. Avropa ölkələri Rusiyanın bu qərarına etirazını bildirib.
