Bir qrup jurnalist yazıçı Əkrəm Əylislinin “Daş yuxular” romanı ilə bağlı bəyanat imzalayıblar. Modern.az bildirir ki, bəyanatı imzalayanlar son günlər Azərbaycanda Əkrəm Əylislinin "Daş yuxular" romanının probem kimi süni şişirdildiyini bildiriblər.
“Amma bu şişirtmə əndazəsini aşaraq, Azərbaycanda ifadə azadlığına açıq təhlükə halına gəlmişdir. Bu səbəbdən biz - aşağıda imza edənlər ziyalı mövqeyi nümayiş etdirərək, ifadə azadlığına yaranmış təhlükənin qarşısında dayanmağı qərara almışıq...
... Ziyalı xalqın beynidir və o beynə nəyisə düşünməyi qadağan etmək xalqın düşüncədən məhrum edilməsidir. Düşündüyünü ifadə etməyi qadağan etmək isə əslində düşüncənin məhv olması deməkdir. Əkrəm Əylisli bir ziyalı kimi düşündüyünü ifadə etmək azadlığına malikdir. Ədəbi əsərlər isə xüsusi istisna təşkil edir və ədəbi qəhrəmanların dili ilə deyilənlər müəllifin mövqeyi kimi qəbul edilmir”.
Bəyanatda deyilir ki, “ən ağır dövrlərində belə öz parlamentində ermənilərə, ruslara, digər azlıqlara yer verən Cümhuriyyətin, 1991-ci il 18 oktyabr tarixli Konstitusiya Aktına əsasən, varisi olaraq bu böyük tolerantlıq ənənəsini itirməyə haqqımız yoxdur. Ona görə də biz indi şəxslərin, nifrətin, linçləmənin yox, dəyərlərin, ifadə azadlığının yanındayıq”.
Bəyanata ilkin olaraq qoşulanlar:
Şahvələd Çobanoğlu
Elnur Astanbəyli
Zamin Hacı
Seymur Baycan
İlkin Qəmbər
Əli Əkbər
Gündüz Ağayev
Zaur Qurbanlı
Günel Mövlud
Hacı Hacıyev (İsveçrə)
