Fevralın 7-də İctimai Televiziya Əkrəm Əylislinin “Daş yuxular” əsəri ilə bağlı debat təşkil edib. Bu debatda Əkrəm Əylisli verilişə çağırılan qonaqların hamısı tərəfindən ciddi tənqidlərə məruz qalıb və özünə tək bəraət qazandırmalı olub.
Debatın aparıcısı Anar Yusifoğlunun sözlərinə görə, o, yazıçını tənqid edənlərlə yanaşı, onu müdafiə edənləri də veilişə çağırıb.
“Onu müdafiə edənlərdən Seyran Səxavət, Şərif Ağayar, Səfər Alışarlı və Etibar Əliyevi tapa bildik”-deyə Anar Yusifoğlu həmin şəxslərin müzakirələrdə iştiraka gəlməkdən boyun qaçırdıqlarını bildirib.
Mediada Əkrəm Əylislini müdafiə edən şəxs kimi təqdim olunan yazıçı Səfər Alışarlı isə bu təqdimatla razı deyil. Modern.az-ın məlumatına görə, S.Alışarlı jurnalistləri onun adını bu məsələdə hallandırmamağa çağırıb.
