Bu gün Azərbaycan-Özbəkistan” Dostluq Cəmiyyətinin hesabat konfransı keçirilib.
Modern.az-ın məlumatına görə, tədbirdə “Azərbaycan-Özbəkistan” Dostluq Cəmiyyətinin ötən illər ərzində gördüyü işlər barədə Eldar İbrahimovun hesabatı dinlənilib.
E.İbrahimov deyib ki, 2002-ci ilin dekabr ayında mərhum dövlət başçısı Heydər Əliyevin xeyir-duası ilə yaradılan və qeydiyyatdan keçən “Azərbaycan-Özbəkistan” Dostluq Cəmiyyətinin 2012-ci ildə on ili tamam olub.
“Bu cəmiyyət hal-hazırda Azərbaycanda yaşayan, lakin müxtəlif səbəblərə görə uzun müddət Özbəkistanda yaşamış və işləmiş azərbaycanlı ziyalıların və respublikamızda yaşayan, öz xalqını layiqincə təmsil edən özbəklərin təşəbbüsü ilə yaradılmışdır. Statistik məlumatlara görə Azərbaycanda yaşayan özbəklərin sayı 400 nəfərə yaxındır. Bildiyiniz kimi, Azərbaycan və Özbək xalqları arasındakı münasibətlərin kökü uzaq keçmişə gedib çıxır. Əsrlər boyu və hal-hazırda da bizim xalqları bir-birinə bağlayan dostluq əlaqələri və mehriban münasibətlər dilimizin, dinimizin, adət-ənənələrimizin və mədəniyyətimizin eyni köklərə malik olmasıdır. Cəmiyyəti yaratmaqda məqsəd isə bu əlaqələri və ənənələri SSRİ dağıldıqdan sonra Azərbaycan və Özbəkistanın əldə etdikləri müstəqillik dövründə də inkişaf etdirməkdir. Bu cəmiyyətin yaranması həm də onunla əlamətdardır ki, Azərbaycan və Özbəkistan Respublikalarının başçıları – Azərbaycanın qurucusu Ulu öndərimiz Heydər Əliyev və Özbəkistanın inkişafında misilsiz xidmətləri olan hörmətli İslam Kərimov arasında həmişə dostluq və qardaşlıq münasibəti olmuşdur. Hazırda bu münasibət hörmətli Prezidentimiz cənab İlham Əliyev tərəfindən çox uğurla davam etdirilir”.
E.İbrahimov xatırladıb ki, cəmiyyətin idarə heyətinə ictimai-siyasi xadimlər, ədəbiyyat və incəsənət xadimləri, Milli Məclisin deputatları olan AMEA-nın müxbir üzvləri - Yaqub Mahmudov, Nizami Cəfərov, AMEA-nın müxbir üzvü Kamal Abdulla, filologiya elmləri doktoru nəvaişünas alim Tərlan Quliyev, şair Akif Bağırov və başqaları daxildir. Onların təşəbbüsü və yaxından köməyi ilə ötən illər ərzində Bakıda Özbəkistanın və Azərbaycanın görkəmli şair və mütəfəkkirlərinə həsr olunmuş bir sıra tədbirlər keçirilib.
"Azərbaycan-Özbəkistan" Dostluq Cəmiyyətinin fəaliyyətinin çoxşaxəli olduğunu deyən E.İbrahimovun sözlərinə görə, hər iki tərəfin nümayəndələri iki qardaş xalqlar arasındakı ədəbi-mədəni əlaqələrin yüksələn xətt üzrə inkişafına çalışırlar.
”Biz dostluq cəmiyyəti olaraq yalnız dostluq və mədəni əlaqələrin təşkili ilə məhdudlaşmırıq, həm də ölkələrimizin iqtisadi-siyasi həyatında baş verən hadisələrdə də daim iştirak edərək bir ictimai birlik kimi öz münasibətlərimizi bildiririk.
Görülən işlərlə yanaşı, diqqətinizə çatdırmaq istəyirəm ki, Cəmiyyət nizamnamədə nəzərdə tutulan funksiyaların bir çoxunu yerinə yetirə bilməmişdir. Bu da onunla əlaqədardır ki, cəmiyyət qeyri-hökumət təşkilatı statusunda olduğuna görə ona dövlət büdcəsindən vəsait ayrılmır. Eyni zamanda üzvlük haqqı, ianə və digər mənbələrdən də vəsait daxil olmur. Keçirdiyimiz bütün tədbirləri isə demək olar ki, öz şəxsi vəsaitimiz, bəzi şəxslərin mənəvi dəstəyi və köməkliyi sayəsində həyata keçirmişik. Bütün bu çətinliklərə baxmayaraq Azərbaycan-Özbəkistan Dostluq Cəmiyyəti mövcud dostluq əlaqələrinin möhkəmlənməsi və inkişafı yolunda bundan sonra da əlindən gələni əsirgəməyəcəkdir”
İclasda "Azərbaycan-Özbəkistan" Dostluq Cəmiyyətinin sədri və qurumun idarə heyətinin formalaşdırılması məsələsi müzakirəyə çıxarılıb. Milli Məclisin Aqrar siyasət komitəsinin sədri Eldar İbrahimov yekdilliklə yenidən "Azərbaycan-Özbəkistan” Dostluq Cəmiyyətinin sədri seçilib. İdarə heyəti formalaşdırılırb.
Qeyd edək ki, iclasda Milli Məclisin deputatları Əli Əhmədov, Eldar İbrahimov, Musa Quliyev, Azay Quliyev, Ziyad Səmədzadə, Hüseynbala Mirələmov, Rövşən Rzayev, Mübariz Qurbanlı, Aydın Abbasov, Mübariz Qurbanlı, eləcə də Özbəkistan Respublikasının Azərbaycandakı səfiri Şerzod Fayziyev iştirak edib.
Modern.az
