Bu il təhsildə başqa təcrübədən, yeni prioritetlərdən istifadə edirik.
Modern.az-ın məlumatına görə, bunu Təhsil Nazirliyinin Ümumi və məktəbəqədər təhsilin təşkili şöbəsinin müdir müavini Orxan Abbasov deyib.
Onun sözlərinə görə, vətəndaşların çoxsaylı müraciətləri nəzərə alınaraq prioritetlərin sayı artırılıb: "Belə ki, bu ildən etibarən məktəblərə qəbul zamanı ərazi ilə yanaşı bacı-qardaşın bir yerdə oxuması və valideyinlərin bu məktəblərdə çalışması məsələləri də nəzərə alınır".
O.Abbasov bu zaman şagirdlər üçün nə fərqlilik olacağını diqqətə çatdırıb:
"Burada şagirdlər onlar üçün fərqli məqamı nazirliyin birbaşa tərkibində olan 8 müəssisədə və 106 nömrəli gimnaziyada keçirilən müsabiqədə hiss edəcəklər. Yəni bu məktəblərdə rus bölməsinə yazılan şagirdlər həmin ərazidə yaşayırsa, qardaş-bacıları burada oxuyursa, onlar artıq müsabiqəni keçib avtomatik qəbul olacaq".
