Fevralın 27-də Xəzər-Avropa İnteqrasiya İşgüzar Klubunun (CEIBC) üzvləri Dövlət Sosial Müdafiə Fondunun (DSMF) sədri Səlim Müslümov ilə görüşüblər. Klubun prezidenti və baş icraçı direktoru Telman Əliyev qurumun fəaliyyəti barədə məlumat verərək bildirib ki, CEIBC-nin əsas məqsədi dövlət orqanları və biznes nümayəndələri arasında əlaqələri inkişaf etdirməkdir.
Daha sonra DSMF sədri S.Müslümov “Azərbaycanın sığorta-pensiya sistemində sistem xarakterli dəyişikliklər: inzibati nəzarətin ictimai nəzarətlə əvəzlənməsi” mövzusunda təqdimatla çıxış edib. S.Müslümov vurğulayıb ki, bu gün Azərbaycanın beynəlxalq standartlara tam cavab verən sığorta-pensiya modeli formalaşıb və bu model müasir dünyada sığorta-pensiya sistemləri üzrə ən mühüm elementləri özündə birləşdirir. DSMF sədri son dövrlər həyata keçirilən islahatlara və əldə olunan nəaliyyətlərə toxunmaqla yanaşı, perspektivdə gözlənilən islahat tədbirləri barədə də ətraflı məlumat verib. S.Müslümov Azərbaycan Prezidenti İlham Əliyevin müvafiq sərəncamına uyğun olaraq sığorta-pensiya sisteminin uzunmüddətli inkişafı üzrə strateji hədəflərin müəyyənləşdirilməsi və sistem göstəricilərinin müasir tələblərə uyğunlaşdırılması məqsədilə Pensiya təminatı sisteminin islahatı Konsepsiyası layihəsinin hazırlandığını vurğulayıb.
DSMF sədri nəzərə çatdırıb ki, indiki mərhələdə qarşıya qoyulan vəzifələrə tam nail olmaq məqsədi ilə inzibati nəzarətin ictimai nəzarətlə dəstəklənməsi və bu əsasda daha şəffaf idarəetmə mexanizmlərinin tətbiqi əsas hədəf kimi götürülüb.
“Elektron xidmətlərin tətbiqi dairəsinin genişləndirilməsi qeyd olunan istiqamətdə atılan mühüm addımlardandır” - deyən S.Müslümov "Dövlət orqanlarının elektron xidmətlər göstərməsinin təşkili sahəsində bəzi tədbirlər haqqında" Prezidentin Fərmanına uyğun olaraq DSMF-nin gördüyü işləri sadalayıb. Fond sədri qeyd edib ki, islahat tədbirləri və sığorta-pensiya sisteminin inkişaf istiqamətləri nəzərə alınmaqla Nazirlər Kabinetinin 17 oktyabr 2012-ci il tarixli 235 nömrəli Qərarı ilə yeni redaksiyada təsdiq edilmiş "Elektron xidmət növlərinin Siyahısı"na əsasən DSMF tərəfindən göstərilən elektron xidmətlərin sayı 25-ə çatdırılıb:
“Bu xidmətlərin hər biri vətəndaşla məmur arasında ünsiyyətin aradan qaldırılmasında mühüm əhəmiyyətə malikdir”.
S.Müslümov inzibati nəzarətin ictimai nəzarətlə əvəzlənməsi baxımından əhalinin yenicə istifadəsinə verilən "Sığortaolunanlara məlumatların verilməsi" adlı müasir məlumatlandırma sisteminin xüsusi rola malik olduğunu qeyd edib:
“Bu xidmət vətəndaşların gələcək pensiya təminatında, şəffaflığın təmin edilməsində olduqca əhəmiyyətlidir və avtomatlaşdırılmış pensiya təyinatına keçidin əsas elementidir”.
S.Müslümov hazırda DSMF tərəfindən 2 milyon 360 minə yaxın nəfərə fərdi şəxsi hesab açıldığını və bu xidmətdən həmin vətəndaşların hamısının yararlanmaq imkanının olduğunu bildirib. Hər bir əmək müqaviləsi ilə işləyən vətəndaş DSMF-nin saytına daxil olmaqla (www.sspf.gov.az www.dsmf.gov.az) sığortaedən (işəgötürən) tərəfindən hər ay üzrə ödənilən məcburi dövlət sosial sığortası barədə məlumatları maneəsiz əldə edə və öz pensiya kapitalına, həm də işəgötürəninə nəzarət etmək imkanı qazana bilər.
O, hazırda pensiya və müavinət təyinatının avtomatlaşdırılması üzrə işlərin sürətləndirildiyini və bu il iyulun 1-dən etibarən pensiyaların avtomatlaşdırılmış təyinatına keçidin nəzərdə tutulduğunu bildirib:
“Bunun üçün vətəndaşların 2006-cı ilə qədər əmək stajı barədə məlumatı DSMF orqanlarına təqdim etmələri olduqca zəruridir. Hazırda Fond stajların toplanması istiqamətdə işləri daha da intensivləşdirib və bu işdə vətəndaşların da aktiv iştirak etməsi vacibdir. Yaxın aylarda vətəndaşların 2006-cı ilə qədər mövcud olan pensiya kapitalları barədə məlumatlar da "Sığortaolunanlara məlumatların verilməsi" elektron xidmətində öz əksini tapacaq. 2006-cı ilə qədər əmək stajı barədə məlumatı DSMF orqanlarına təqdim edən vətəndaşlar avtomatlaşdırılmış pensiya təyinatından maneəsiz istifadə edə biləcəklər”.
Tədbirdə S.Müslümov klub üzvlərini maraqlandıran sualları cavablandırıb, mövzu ətrafında müzakirələr aparılıb. Eyni zamanda DSMF tərəfindən göstərilən elektron xidmətlər tədbir iştirakçılarına nümayiş etdirilib.
Modern.az
