Azərbaycan seysmoloqları Omanda səfərdə olublar - FOTOLAR | Modern.az

AMEA Respublika Seysmoloji Xidmət Mərkəzinin nümayəndə heyəti Oman Sultanlığında səfərdə olub. Oman Sultanlığının paytaxtı Maskat şəhərində keçirilən “8-ci Körfəz Seysmik Forum”unda Azərbaycanı AMEA RSXM-in baş direktoru, geologiya-minerologiya elmlər doktoru Q. Yetirmişli, Seysmologiya şöbəsinin müdiri, geologiya-minerologiya elmlər doktoru T.Məmmədli və mərkəzin əməkdaşı R. Kərimova təmsil ediblər.

Maskat şəhərində yerləşən Sultan Qabus Universitetində keçirilən tədbirdə ABŞ, İngiltərə, İtaliya,Kanada, Makedoniya, Çex , Türkiyə, Almaniya, Avstriya, CAR, Yəmən, Misir, Avstraliya və 40-dan çox başqa  ölkələrdən seysmoloq alimlər və mütəxəssislər iştirak edib. Tədbir zamanı Körfəz ölkələrində, eləcə  də forumda iştirak edən ölkələrdə seysmik təhlükə və riskin qiymətləndirilməsi  ətrafında məruzələr təqdim olunub  və geniş müzakirələr aparılıb. Forumda Azərbaycan nümayəndə heyəti tərəfindən respublika ərazisindəki seysmik şərait və risk haqqında məruzə təqdim olunub.

AMEA Respublika Seysmoloji Xidmət Mərkəzinin Mətbuat Xidməti Modern.az-a bildirib ki, tədbir çərçivəsində AMEA RSXM-in nümayəndə heyətinin ikitərəfli görüşləri də olub. Forumda iştirak edən dünya şöhrətli seysmoloq alim, ABŞ-ın  Massaçusets Texnologiya İnstitutunun professoru Nafi Toksöz və  Azərbaycan seysmoloqları arasında görüş keçirilib. Görüşdə gələcək birgə əməkdaşlıq perspektivlərini müzakirə olunub. Azərbaycan nümayəndə heyətinin  Oman Sultanlığının Seysmoloji Mərkəzinin rəhbəri İsa-əl-Hüseynlə də ikitərəfli görüşü olub. Görüşdə iki ölkə seysmoloqları arasında əməkdaşlıq və gələcək perspektivlər müzakirə edilib. Həmçinin Oman Sultanlığının Seysmoloji Mərkəzinin rəhbəri İsa-əl-Hüseyn RSXM-də görülən işlərlə tanış olmaq üçün  Azərbaycana dəvət edilib.

Qeyd edək ki,   müzakirələr zamanı növbəti forumun gələn il Bakıda keçirilməsi ilə bağlı fikir mübadiləsi aparılıb. Forumun gələn ilin yaz-yay aylarında keçirilməsi nəzərdə tutulur. 







Modern.az