Dünən Rusiya prezidenti Vladimir Putinin "Valday"da Ermənistan-Azərbaycan sülh müqaviləsinin "prinsipləri" haqqında verdiyi açıqlamadan sonra Ermənistanın ictimai-siyasi dairəsində canlanma hiss olunmaqdadır.
Modern.az xəbər verir ki, bunu Milli Məclisin deputatı Azay Quliyev deyib.
Onun sözlərinə görə, Paşinyan bu gün verdiyi açıqlamada təhrikedici (bir az da şantaj) ritorikadan istifadə etməklə sülh sazişinin Rusiya "variantı"nı müzakirə etməyə hazır olduğunu bildirib.
"Bu isə o deməkdir ki, oktyabrın 31-də nəzərdə tutulan üçtərəfli Soçi görüşündə heç bir razılıq olmayacaq.
Anlaşılan odur ki, Azərbaycanın müəyyən etdiyi 5 təməl prinsip əsasında Ermənistanla sülh müqaviləsinin imzalanması Cənubi Qafqazda qalıcı sülhün və təhlükəsizliyin yeganə qarantıdır.
Belə olan halda, "Brüssel Danışıqlar Formatı"ın aktuallığı və önəmi daha da artır", - Azay Quliyev vurğulayıb.
Qeyd edək ki, ötən gün “Valday” klubunun iclasına qatılan Rusiya Prezidenti Vladimir Putin Ermənistanla Azərbaycan arasında danışıqlarda Qərbin vasitəçilik fəaliyyətinə münsibət bildirib. Rusiya lideri deyib ki, sülh müqaviləsinin Vaşinqton variantı Azərbaycanın Qarabağ üzərində suverenliyinin tanınmasını nəzərdə tutur.
"Biz sülh yolu ilə nizamlanmanın, o cümlədən sərhədin delimitasiyası və sərhəd məsələsinin tam həllinin tərəfdarıyıq. İstənilən halda, hansı variant seçilsə, bu, sülhə gətirib çıxararsa, biz yalnız bunun tərəfdarı olacağıq. Amma biz heç nəyi məcbur etmək fikrində deyilik. Biz Ermənistana heç nə diktə edə bilmərik və etməyəcəyik. Əgər Ermənistan xalqı və rəhbərliyi hesab edirsə ki, sülh müqaviləsinin hansısa varinatını seçmək lazımdır, başa düşdüyüm qədər bu Vaşinqton planıdır. Bu, Azərbaycanın Qarabağ üzərində suverenliyinin tanınmasını ehtiva edir. O zaman buyursunlar”, - Rusiya lideri söyləyib.
