Modern.az

Ortada çirkin niyyətlər var - Deputat DİM-ə hücumlardan YAZDI

Ortada çirkin niyyətlər var - Deputat DİM-ə hücumlardan YAZDI

Təhsil

15 Mart 2023, 10:28

Ceyhun Məmmədov,
Milli Məclisin deputatı


Dövlət İmtahan Mərkəzi ilə yaxından və ya uzaqdan heç bir əlaqəm yoxdur. Hətta rektor işlədiyim vaxtlarda aramızda bir məslə ilə bağlı fikir ayrılığı da olub.

Ancaq son zamanlar Dövlət İmtahan Mərkəzinin hədəfə alınmasını, ləğvi ilə bağlı fikirlərin səsləndirilməsini yanlış və bir sıra hallarda məqsədli hesab edirəm.

Hər bir qurumun fəaliyyətindən, qəbul etdiyi qərarlardan kimlərsə narazı ola bilər. Ancaq bu o demək deyil ki, qurum və ya sistem ləğv edilməlidir.


Hesab edirəm, bu gün ölkədə fəaliyyətini ən peşəkar səviyyədə quran qurumlardan biri də Dövlət İmtahan Mərkəzidir. Əgər kimsə düşünürsə  ki, bu qurumun və sistemin ləğvi ilə təhsilimiz daha ağ günə çıxacaq, yanılır. Onsuz da bu gün uzun illərdir yaranmış ənənələrin mərhələli və məqsədli şəkildə pozulduğunu bir sıra hallarda müşahidə edirik.

İmtahanların çətin olması fikrinə gəldikdə isə bunun hansısa məqamda və mərhələdə çətin olması fikri nəzərdən keçirilə bilər. Hesab edirəm ki, bu gün onsuz da ali məktəblərə qəbulu kifayət qədər asanlaşdırmışıq. Biz hamının ali təhsilə kütləvi gəlməsi barədə deyil, oxumağa həvəsi və potensialı olan insanların gəlməsi barədə düşünməliyik.

Valideynlərə və bizim dəyərli övladlarımıza gəldikdə isə bilməlisiniz ki, bu gün şəffaf şəkildə  imtahan prosesində iştirak etdiyiniz halda gələcəkdə fərqli vəziyyət və hallarla üz-üzə qala bilərik.
 

Bu gün Dövlət İmtahan Mərkəzinin ləğvini, müsabiqədənkənar qəbulu dəstəkləyən insanların niyyətləri onların heç də bu fikirdə saf və təmiz olması demək deyil. Burada çirkin məqsəd və niyyətlər də var. Bəzilərinin buna biznes gözü ilə baxması da istisna deyil. Ona görə hissə qapılaraq total hücuma keçib kimlərinsə dəyirmanına su tökməyək.

Eyni zamanda hesab edirəm, Dövlət İmtahan Mərkəzi də narazılıqları görməməzlikdən gəlməməli və qulaqardına vurmamalıdır. Əgər hansısa məsələdə obyektiv narazılıq varsa, bu ciddi təhlil edilməli nəticələr ictimaiyyətə açıqlanamlıdır. Gəlin təhsilimizi qoruyaq, onun təəssübünü çəkək.

Youtube
Kanalımıza abunə olmağı unutmayın!
Keçid et
Dronlar Putinin mülk və sarayı istiqamətində hücuma keçdi