ABŞ-ın dövlət başçısı Co Baydenin reytinqi prezident seçilməsindən bəri ən aşağı səviyyəyə düşüb.
Modern.az xəbər verir ki, bunu "Gallup" tədqiqat xidmətinin keçirdiyi sorğunun nəticələri göstərir.
Sorğu zamanı respondentlərin 37%-i Baydeni dəstəklədiyini bildirib.
Aprelin 3-dən 25-dək keçirilən sorğuda 1000 yetkin amerikalı iştirak edib. Sorğunun nəticələri göstərir ki, demokratların 83%-i və respublikaçıların 4%-i ABŞ prezidentinin fəaliyyətini bəyənir.
Bundan əlavə, sorğu zamanı amerikalılardan iqtisadiyyatdakı vəziyyəti qiymətləndirmələri xahiş olunub. Respondentlərin 16%-i iqtisadiyyatın əla və ya yaxşı, 47%-i isə pis olduğunu deyib. Respondentlərin 19%-i iqtisadiyyatda vəziyyətin yaxşılaşdığını düşünür, 75%-i isə əks fikirdədir.
Xatırladaq ki, aprelin 25-də Co Bayden 2024-cü il seçkilərində yenidən namizəd olacağını açıqlayıb. O, seçicilərdən başladığı “işi bitirmək” üçün ona daha çox vaxt vermələrini istəyib.
