“Nazirin qərarı təhsilini bitirmiş tələbələrə şamil olunmur”
Təhsil nazirinin müəllimlərin işə qəbulu ilə bağlı yeni əmri ilə müəllimlərin işə qəbul qaydaları təsdiqlənib. Qaydalarda bakalavriat səviyyəsində qiyabi təhsil alan tələbələrin müəllim vəzifəsinə işə qəbuluna icazə verilmədiyi qeyd olunub. Bu isə cəmiyyətdə geniş rezonans doğurub. Bəziləri belə başa düşüb ki, balakvriatda qiyabi oxuyub təhsilini başa vurmuşlar da müəllim işləyə bilməyəcək.
Milli Məclisin Elm və təhsil komitəsinin üzvi, millət vəkili Asəf Hacıyev Modern.az-a açıqlamasında bildirib ki, bu barədə bilgisi azdır və belə bir məsələ varsa, Təhsil Nazirliyinin qərarı olduğundan parlament onun işinə qarışa bilməz. “Milli Məclis nazirliklərin işinə qarışmır. Əgər belə qərar qəbul edilibsə bu göydəndüşmə olmayıb, analiz edib qərar qəbul ediblər”, – deyə millət vəklili vurğulayıb.
Təhsil eksperti Etibar Əliyev isə Təhsil Nazirliyinin bakalavriat səviyyəsində təhsil alan tələblərin müəllim işləməyə icazə verilməməsi qərarını doğru hesab edib.
“Qiyabi formada oxuyan 3-cü kurs tələblərinin orta məktəbə müəllim götürülməsi nə dərəcədə düzgündür!? Bu, kursun başa çatdırılmaması deməkdir. 3-cü kursa qədər keçirilən fənlərin əksəriyyətinin orta məktəblə demək olar ki, əlaqəsi yoxdur. Kursu tam bitirməmiş vətəndaşların, orta məktəblərə müəllim götürülməsi, ümumiyyətlə, dünya praktikasında yoxdur”.
Bu qərarın bir o qədər əks-ədası olacağını gözləmədiyini deyən E. Əliyev vurğulayıb ki, heç kim övladının müəlliminin yarımçıq təhsilli şəxs olmasını istəməz. “Hamı bilir ki, qiyabi təhsil ümumiyyətlə rüşvət tələsədir. Qiyabiçilərin əksəriyyəti sessiyalarda demək olar ki, iştirak etmir”.
E. Əliyev qərarın qiyabi təhsil alan tələbələrə aid olduğunu deyir. “Qiyabi formada təhsilini başa vurmuş tələblər müəllim ola bilərlər. İndiyə qədər olan normativ sənədlərdə tələbə ali məktəbin qiyabi formasının 3 və 4-cü pilləsində təhsil alan tələbələrə müəllimlərə işləməyə icazə verilirdi. Amma yeni nazirin əmri ilə bu dayandırıldı. Və hesab edirəm ki, bu düzgün qərardır”.
Təhsil eksperti həmçinin vurğulayıb ki, qiyabi təhsil dayandırılmalıdır ya da dünyada olduğu kimi distant təhsilə keçilməlidir. “Distant təhsilə keçid yaranmasa qiyabi təhsil haqqında həmişə neqativ fikirlər səslənəcək”.
Təhsil Nazirliyindən Modern.az saytına bildirilib ki, bu qərar hazırda qiyabi formada təhsil alan tələbələrə aiddir, qiyabi təhsilini başa vurmuş məzunlara yox. “Qərarın təhsilini bitirmiş tələblərə heç bir aidiyyəti yoxdur, onlar müəllim olmaq üçün imtahan verə bilərlər. Amma qiyabi formada hazırda təhsil alan tələbələrə müəllim olmağa icazə verilmir”.
Aytən ƏLİYEVA
