Nazirlik yazı müsabiqəsi elan edib | Modern.az

Rabitə və İnformasiya Texnologiyaları Nazirliyi "İKT ili" çərçivəsində “Respublikada “Elektron hökumət”: mövcud vəziyyət, problemlər, perspektiv və gözləntilər” mövzusunda analitik məqalə müsabiqəsi elan edir.

Nazirlikdən Modern.az-a verilən məlumata görə, müsabiqədə jurnalistlərlə yanaşı, elmi işçilər, mütəxəssislər  və maraqlı olan digər şəxslər iştirak edə bilər. Müsabiqədə iştirak etmək istəyən şəxs “www.e-gov.az” portalında qeydiyyatdan keçməli və məqalələri göndərərkən qeydiyyat nömrəsini e-məktuba əlavə etməlidir. Qeydiyyat tarixi 28 avqust 2013-cü il tarixinədəkdir. Müsabiqə iki mərhələdə keçiriləcək. Birinci mərhələ 2013-cü il 15 iyul-31 avqust, ikinci mərhələ 1-20 sentyabr tarixlərini əhatə edəcək. Birinci mərhələdə iştirakçılar  məqaləsini hər hansı bir qəzet, jurnal və ya elektron KİV-də dərc etdirməli, dərc olunmuş qəzet, jurnal səhifəsinin skan edilmiş surəti və ya məqalənin internet ünvanını Təşkilat Komitəsinə göndərməlidir. Məqalələrin dərc olunma tarixi qeydiyyat tarixindən sonrakı tarixə uyğun olmalıdır.

Birinci mərhələnin nəticələrinə əsasən Təşkilat Komitəsi tərəfindən qiymətləndirilmiş  10 nəfər ikinci mərhələyə keçəcəkdir. Bu mərhələdə onlar Təşkilat Komitəsi tərəfindən müəyyən ediləcək mövzular üzrə məqalələr hazırlayıb dərc etdirməlidirlər.

İştirakçı tərəfindən müsabiqəyə təqdim edilən məqalə sayına məhdudiyyət qoyulmur və   qeydiyyat dayandırılana qədər iştirakçı məqaləsindən imtina edib yeni məqalə ilə çıxış edə bilər. Hər bir məqalədə “Elektron hökumət” portalının ünvanının (www.e-gov.az) göstərilməsi əsas şərtlərdəndir. Dərc olunmuş məqalənin elektron variantı “Elektronhökumət” portalının “Facebook” və “Twitter” səhifəsində açıq müzakirəyə yerləşdirilməsi üçün təqdim olunmalıdır. Qeyd olunan şərtlərə uyğun olmayan məqalələr Təşkilat Komitəsi tərəfindən baxılmayacaq.

Təşkilat Komitəsi qiymətləndirmə zamanı məqaləyə sosial şəbəkələrdən daxil olmuş rəyləri, iştirakçının “Elektron hökumət” portalından istifadə fəallığını, portalın analiz olunmasında “Elektron hökumət” bülletenlərinə istinadları və təcrübi digər faktları nəzərə alacaq. Qiymətləndirmənin nəticələri “Elektron hökumət” portalında dərc olunacaq.   2013-cü ilin sentyabr ayında müsabiqənin yekunlarına həsr olunmuş təqdimat mərasimi keçiriləcək, qaliblər mükafatlandırılacaq və ən yaxşı məqalələr “Elektron hökumət” portalında (www.e-gov.az) elan olunacaq.

Müsabiqənin mükafat fondu:

“Qran Pri”  - 3000 manat  

1-ci yer - 2500 manat 

2-ci yer - 1500 manat 

3-cü yer - 1000 manat 

4-10-cu yerlər – noutbuklar

İştirakçıların hər birinə e-imza vəsiqəsi, kart oxuyucusu, 6 aylıq “Azdatakom” internet xidməti (2 Mb/s) hədiyyə ediləcək.

Müsabiqə üçün yazılmış məqalələr bu ünvana göndərilməlidir: [email protected]. Müsabiqə haqda daha geniş məlumatları “www.e-gov.az” “Elektron hökumət” portalından, eləcə də RİTN-in mətbuat xidmətindən əldə etmək olar. Əlaqə telefonları:  157 (dax.4), 5984271. Fax: 565 14 52.

 

Modern.az