İnsanın inamlı olması üçün gerçəklik çox az tutalğa verir.
***
İnamlı olmaq üçün gerçəkliyi ötməlisən.
***
İnam – insanın həqiqət axtarışı, yaradıcılığıdır.
***
Gerçəklikdə həqiqət yoxdur, demək, inam da yoxdur. Bəşərin inamsızlığı bundandır.
***
Həqiqət – insanın idealıdır. Həqiqətsiz gerçəklik insanı bezdirər, öldürər.
***
İnsanın həqiqət istəyi – gerçəkliyi ötmək, onun asılılığından çıxmaqla bağlıdır.
***
İnsandan başqa heç bir canlının həqiqət istəyi yoxdur, ona görə gerçəkliyin asılılığından çıxa bilmirlər.
***
Dərk edilən – idrakın yendiyidir.
***
Dərk edilməyən – idrakın yenildiyidir.
***
İdrak – dünyanın həqiqət əsasında dəyərləndirilməsidir.
***
Dəyərləndirmə – gerçəkliyə, olaylara həqiqət ölçüsündən yanaşmadır.
***
İdrakın əsaslandığı mütləq ölçü olmasa, dünya dərk oluna bilməz.
***
Dünyanın mahiyyətini bilən – dünyaya doğmalaşır.
***
Dünyanın mahiyyətini bilməyən – dünyaya yadlaşır.
***
Gerçəklik insanı yarıtmır, ona görə insan gerçəkliyi dəyişdirir – insaniləşdirir.
***
İnsan – bütün varlığı özündə daşıyan ən uca varlıqdır.
***
Nəyi bilirsən, dərk edirsən – onu yaşayırsan.
***
İnsan idrak aclığını biliklə doyurur.
***
Cismani yaşamın məqsədi – ruhani yaşama xidmət etməkdir.
***
İnsanın ən ali yaşamı – ruhani yaşamdır. Ruhani yaşam uğrunda cismani yaşamdan keçməyə dəyər.
***
Daha çox ruhani yaşam, daha az cismani yaşam!
***
Dünyada cismani, maddi aclıqdan, yoxsulluqdan daha çox ruhani aclıq və yoxsulluq var.
***
Bəşər hələ cismani yaşam dönəmini yaşayır. Ondan sonra onun ruhani yaşam dönəmi gələcək.
