Türkiyənin nəqliyyat və infrastruktur naziri Abdulkadir Uraloğlu Zəngəzur dəhlizinin Azərbaycan və Naxçıvanı birləşdirəcəyini, Türkiyə ilə yeni nəqliyyat əlaqəsini təmin edəcəyini bildirib.
Modern.az "Hürriyet"ə istinadən xəbər verir ki, o, Zəngəzur dəhlizinin həyata keçirilməsinin Pekindən Londona qədər Şərq-Qərb ticarətinin artmasına müsbət töhfə verəcəyini vurğulayıb.
“Zəngəzur dəhlizi gələcəkdə Cənubi Qafqazda iqtisadi əməkdaşlığın inkişafı üçün yeni imkanlar verəcək. Zəngəzur dəhlizinin fəaliyyət göstərməsi ilə orta dəhlizin dəmir yolu və avtomobil yolu ilə yükdaşıma qabiliyyəti artacaq ki, bu da Pekindən Londona Şərq-Qərb ticarətinin artmasına müsbət töhfə verəcək. Orta dəhlizin səmərəliliyinin artması ilə Xəzər dənizində Azərbaycanla işlənə biləcək layihələr, o cümlədən Rusiya ilə əməkdaşlıq sahəsində ölkəmizin regiondakı strateji mövqeyinin əhəmiyyəti artacaq", - nazir qeyd edib.
Uraloğlu xəttin Ermənistan sərhədinə qədər olan hissəsinin tikintisinin davam etdiyini, Horadizdən Naxçıvanın Ordubad bölgəsinə 166 kilometrlik yeni dəmir yolunun çəkiləcəyini, Azərbaycanla Rusiya arasında dəmir yolu xəttinin tikintisi üçün danışıqlar aparılacağını açıqlayıb. O qeyd edib ki, bu çərçivədə dəmir yolu xətti ilə paralel olaraq avtomobil yolları da istifadəyə veriləcək.
Nazir Zəngəzur dəhlizinin Mərkəzi Asiya, Xəzər regionu, Azərbaycan və Ermənistanı Türkiyə ilə birləşdirən sosial-iqtisadi, geosiyasi və geostrateji xüsusiyyətlərə malik olduğunu və bu dəhlizin dəmir yolu şəbəkəsini genişləndirəcəyini bildirib. O, bunun regional ticarətə müsbət təsir edəcəyini diqqətə çatdırıb.
