Azərbaycan Demokratik Qüvvələrinin Milli Şurasının üzvləri Tiflisin Vere Palas otelinə toplaşmaqdadır. Modern.az “musavat.com”a istinadən bildirir ki, hələlik Milli Şura sədri Rüstəm İbrahimbəyov Tiflisə çatmayıb. Onun hərəkət etdiyi Moskva-Tiflis uçağı yerli vaxtla saat 16.30-da Tiflisə enir. Bakıdan gələn 15 nəfərlik nümayəndə heyətinin bir hissəsi isə artıq Tiflisdədir. Qeyd edək ki, Milli Şura üzvlərinin bir hissəsi, avtomobil, digər bir qrup isə dəmir yolu ilə Tiflisə gəlib.
Müsavat başqanı İsa Qəmbər, Milli Şuranın İcra Aparatının rəhbəri Eldar Namazov, komissiya sədrləri Cəmil Həsənli, Gültəkin Hacıbəyli, Mehman Əliyev isə yaxın bir saatda Tiflisə çatacaq. Onları gətirən Bakı-Tiflis uçağı saat 15.00-da enir. Milli Şura üzvlərinin “Yeni Müsavat”a verdiyi xəbərə görə, Milli Şuranın fövqəladə toplantısı saat 18.00-da (Bakı vaxtı ilə 19.00-da) başlayacaq.
Modern.az
