BMT Baş Assambleyasının sessiyasında ABŞ prezidenti Co Bayden təşkilatın Təhlükəsizlik Şurasının strukturunda dəyişiklik təklif edəcək.
Modern.az xəbər verir ki, Ağ Evin strateji kommunikasiyalar üzrə koordinatoru Con Kirbi "The Daily Telegraph"a deyib.
Belə ki, Bayden Təhlükəsizlik Şurasının tərkibini daha əhatəli etmək istəyir: “Prezident Bayden bu barədə bir az daha danışacaq. Biz açıq şəkildə bildirdik ki, Təhlükəsizlik Şurasının strukturu ilə bağlı sualı qaldırmağın vaxtı çatıb”.
Nəşr yazıb ki, Co Bayden Hindistan, Almaniya və Yaponiya da daxil olmaqla BMT Təhlükəsizlik Şurasına yeni daimi üzv daxil etməkdə israrlıdır. ABŞ həmçinin Braziliya və CAR-ı mümkün daimi üzvlər kimi nəzərdən keçirir. BMT-nin baş katibi Antonio Quterreş bu yaxınlarda bildirmişdi ki, BMT Təhlükəsizlik Şurasının islahatları nəticəsində Afrika ölkələrindən biri daimi üzv qəbul edilməlidir.
Hazırda BMT Təhlükəsizlik Şurasının daimi üzvləri Rusiya, Böyük Britaniya, Çin, ABŞ və Fransadır və yalnız daimi üzvlərin veto hüququ var.
