Avqustun 22-dək Azərbaycan ərazisində hava şəraitinin qeyri-sabit keçəcəyi gözlənilir. Ekologiya və Təbii Sərvətlər Nazirliyi Milli Hidrometeorologiya Departamentindən Modern.az-a verilən məlumata görə, dağlıq və dağətəyi rayonlarda qısamüddətli yağış yağacaq.
Avqustun 19-20-də paytaxtda küləkli hava şəraiti üstünlük təşkil edəcək. Avqustun 20-də axşam külək mülayimləşəcək. Avqustun 21-22-də Bakıda və Abşeron yarımadasında hava şəraitinin dəyişkən buludlu olacağı, arabir tutulacağı gözlənilir. Havanın temperaturu ötən həftə ilə müqayisədə 2-3 dərəcə aşağı olacaq. Ötən həftənin sonu 35 dərəcəyə yaxın temperatur müşahidə edildiyi halda, yaxın 2-3 gün ərzində Bakı və Abşeron yarımadasında gündüz temperaturun 30-32 dərəcəyə yaxın olacağı gözlənilir. Azərbaycanın Aran rayonlarında yaxın günlərdə maksimal temperatur 29-34, dağlıq rayonlarda 24 dərəcə isti olacaq.
Modern.az
