Media eksperi Zeynal Məmmədli son zamanlar telekanallarda sosial şəbəkələrə istinad hallarının artmasına münasibət bildirib. Bu barədə Modern.az-a danışan ekspert qeyd edib ki, sosial şəbəkələr media üçün izə düşmək baxımından faydalı olsa da, əsas qaynaq hesab oluna bilməz:
“Peşəkar media üçün sosial şəbəkələr heç bir halda aparıcı və əsas qaynaq ola bilməz. Müxtəlif elektron qaynaqlarına, internet televiziyalara, xəbər portallarına istinad olunur. “Vaşinqton post”a istinad elədiyin kimi, ona da istinad edirsən. Amma söhbət Facebook, Twitter, Odnoklassniki kimi sosial şəbəkələrdən gedirsə, bunlar bizim üçün informasiya qaynağı ola bilər. Məlumdur ki, televiziya internetə üz tutan tamaşaçısını itirmək istəmir. Amma burda peşəkarlıq söhbəti də var. Əgər məlumatın əsas qaynağı sosial şəbəkələrdirsə, bu, televiziyaya yaraşmaz. Çünki sosial şəbəkədəki məlumat özəl məktub kimi qalmalıdır”.
Z.Məmmədli hesab edir ki, məsələni konkretləşdirmək lazmdır: “Məsələn, Youtube-da paylaşılan videoya yüz minlərlə adam baxırsa, telekanal bunu inkar edə, biganə qala bilməz. Amma görüntünü tam göstrmək yox, sızdırmaq lazımdır”.
İntiqam Valehoğlu
