Millət vəkili Qənirə Paşayevanın rəhbərlik etdiyi Avrasiya Beynəlxalq Araşdırmalar İnstitunu İB ön cəbhədə yeni hərbi xidmətə gəlmiş əsgərlərlə görüş keçirib. Modern.az bildirir ki, əsgərlərə məşhur mütəxəssis Alen Karrın bestseller əsəri olan "Siqareti atmağın asan yolu" kitabı hədiyyə edilib və onlarla bu mövzuda geniş söhbət və müzakirələr aparılıb.
Hərbi xidmətə yenicə başlamış əsgərlər görüşdə "Kim siqaret çəkir?" sualına hər kəsin səmimi və dürüst cavab verməsinə görə təşəkkürünü bildirən millət vəkili Qənirə Paşayeva ortaya çıxan mənzərənin üzücü olduğunu bildirib. Gənclər arasında siqaret çəkənlərin sayı bizi sözün həqiqi mənasında ciddi narahat edir və etməlidir deyən millət vəkili Qənirə Paşayeva onları bu zərərli vərdişdən xilas olmaq üçün düşünməyə və addım atmağa çağırıb. Hərbi hissənin rəhbərliyi bildirib ki, onlar da bu istiqamətdə hərbi hissəyə yeni gəlmiş əsgərlərlə ciddi işlər aparmağa çalışacaqlar.Görüşdə millət vəkili Qənirə Paşayeva bildirib ki, ölkəmizdə xüsusilə gənclər arasında siqaretdən istifadə edənlərin artması hamımızı ciddi narahat etməli və gənclərimizin bu zərərli vərdişə meyillənməməsi istiqamətində səylərimizi daha da artırmalıyıq. Eyni zamanda siqaretdən xilas olmaq istəyənlərə dəstək istiqamətində görülən işlərin artmasının daha da vacib olduğunu bildirən millət vəkili Qənirə Paşayeva bu görüşü keçirmələrində xüsusi məqsədlərinin olduğunu deyib: “Biz bütün gəncləri sağlam gələcək naminə siqaretlə, tütün məhsulları ilə mübarizəyə səsləyirik. Hər bir gəncimiz ilk növbədə özündən, ətrafından başlayaraq tütün məhsullarına qarşı mübarizə aparmalı və gənclərimiz bu zərərli vərdişə tutulmamağa çalışmalıdır. Bu zərərli vərdişə insanlar adətən gənc yaşlarda başlayır və bir çox hallarda bir daha xilas ola bilmirlər”.
Millət vəkili Qənirə Paşayeva əsgərlərlə söhbətdə bildirib ki," Siqareti atmağın asan yolu " kitabı təkcə siqaretdən istifadə edənlərin deyil, etməyən gənclərin də oxumasını xahiş etdi: "İnanıram ki, onu oxuyan bir gənc insan siqaret çəkməyə başlamaz çünki onun nə qədər böyük bir düşmən olduğunu anlayar. İnşallah söhbətlər, müzakirələr və çoxlu sayda hədiyyə etdiyimiz Alen Karr kitabları faydalı olar və gənclər arasında insan üçün çox zərərli olan bu vərdişdən xilas olanların sayı artar."
