Tələbə Qəbulu üzrə Dövlət Komissiyası (TQDK) 2013/2014-cü tədris ili üçün Azərbaycan Respublikasının ali təhsil müəssisələrinə yerləşdirmənin nəticələrini açıqlayandan sonra sevinənlər sırasında jurnalistlər də var.
Modern.az-ın məlumatına görə, Söz Azadlığını Müdafiə Fondunun eksperti, jurnalist
Nəzirməmməd Zöhrablının qızı ali məktəbə daxil olub. N.Zöhrablı bildirib ki, qızı Aygül Quliyeva qəbul imtahanında IV ixtisas qrupu üzrə 622 bal toplayaraq tələbə adını qazanıb. Aygül Azərbaycan Tibb Universitetinə daxil olub.
Digər tanınmış jurnalist
Aydın Canıyevi də qızı sevindirib. A.Canıyev qızının ali məktəbə daxil olmağının sevincini belə bölüşüb: “Anam həmişə deyir sizi oxutdum. Nəhayət... gözlədiyim gün gəlib çatdı, "xəcalətindən" çıxdım: adını qoyduğum qızım Azərbaycan Dövlət Pedaqoji Universitetinin Azərbaycan dili və ədəbiyyatı müəllimliyi fakültəsinə qəbul olundu”.
Daha bir jurnalist ailəsinin də bu günlərdə sevinci yerə-göyə sığmır. Söhbət İctimai Televiziyanın aparıcısı
Vəsilə Vahidqızı ilə "Mediaforum" saytının redaktoru
Hikmət Sabiroğludan gedir. Belə ki, onların oğlu Tural Azərbaycan Dövlət Neft Akademiyasına qəbul olunub.
Yazar-jurnalist, Dünya Gənc Türk Yazarlar Birliyinin sədri
Əkbər Qoşalının da oğlu bu ali məktəbə daxil olan gənclər sırasındadır. Əkbər Qoşalının oğlu Əsgər yüksək nəticələrlə Turizm İnstitutunun tələbəsi adını qazanıb.
Bundan öncə jurnalistlər
Xalid Kazımlı və Könül Şamilqızının övladlarının Bakı Dövlət Universitetinin Hüquq fakültəsinə qəbul olunduğu barədə xəbər vermişdik.
Modern.az
