Milli Şura yarandıqdan sonra müxalif qüvvələrin cəmləşdiyi İctimai Palatanın (İP) gələcək taleyi ilə bədbin proqnozlar verilir. Ziyalılar Forumu da donuq siyasi mücəssəmə olub. Şuranın fonunda siyasi partiyaların ayrı-ayrılıqda fəaliyyəti də kölgədə qalıb.
Bəzi siyasi ekspertlər hesab edir ki, Milli Şura İP-in perspektivi üzərindən xətt çəkib. İP nümayəndələri isə bunun əksini söyləməklə qeyd edirlər ki, Milli Şura bu siyasi qurumun fəaliyyətinə stimul verəcək. Ancaq görünən budur ki, həqiqətən də Milli Şura təsis edildikdən sonra müxalifətin ən böyük birliyi olan İP-in fəaliyyəti sönükdür.
Modern.az-a danışan Müsavat Partiyası Divanının sabiq üzvü, professor Adil Qeybulla ilk olaraq bildirib ki, Azərbaycanda seçkiqabağı siyasi mühitin fəallığı hiss olunmur. O, Milli Şuranın xalqın sifarişi ilə yaranması fikrinə də aydınlıq gətirib.
“Hadisələrin gedişi göstərdi ki, müxalifətin bütün spektrlərinin birləşməsi absurd məsələdir. Milli Şura bir mövqedən çıxış etmə iddiasında olsa da, bu qurumun təcrübəsi müxalifətin çəkici bir nöqtəyə vurması məsələsini arxa plana keçirdi. Azərbaycanda siyasi müxalifətin oriyentasiyası, ayrı-ayrı dövlətlərin siyasi xətti ilə analogiyalar aparması, müxalifətdaxili ziddiyyətlər də buna imkan vermir”.
A. Qeybula qeyd edib ki, Azərbaycan siyasi təcrübəsində bir neçə dəfə bloklar yaradılıb. “Həmin siyasi birliklərin apardığı seçki kampaniyaları qat-qat Milli Şuranınkından effektiv olub. Ona görə də bu cür məsələlər əvvəlcədən düzgün qurulsa idi, daha yaxşı olardı”.
İP-in arxa plana keçməsini etiraf edən A. Qeybulla qeyd edib ki, “Milli Şuranın fəaliyyətsizliyi fonunda İctimai Palatanı da itirmək üzrəyik. Şurada kifayət qədər ziddiyyətlər var. O, iqtidara gəlsə belə, vahid komanda şəklində çıxış edə bilməz. Məncə, seçkidə təklikdə iştirak etmək gücündə olan Müsavat Partiyası konkret ortaya mövqe qoymalı və öz namizədi ilə seçkiyə qatılmalıdır”.
Keçmiş AXCP-çi, hazırda isə Aydınlar Partiyasının sədri Qulamhüseyn Əlibəyli vurğulayıb ki, Milli Şuranın fəaliyyətini normal qarşılamaq lazımdır. “İctimai Palatanın taleyi isə onun öz üzvlərindən asılıdır. Milli Şura İctimai Palataya mane olmur”.
Aqşin KƏRİMOV
