Oktyabrın 9-da keçiriləcək prezident seçkilərində iştirak etmək üçün bu günədək 17 nəfər namizədin seçki sənədləri Mərkəzi Seçki Komissiyasına (MSK) təqdim edilib. Namizədlər arasında hələ ki, Milli Məclisin 5 deputatı da var.
Sentyabrın 15-dən Milli Məclisin payız sessiyası öz işinə başlayacaq. Parlamentin intizam komissiyasının sədri Siyavuş Novruzov Modern.az-a açıqlamasındam bildirmişdi ki, həmin deputatlar Milli Məclisin iclaslarında iştirak də bilməyəcəkləri təqdirdə Milli Məclis rəhbərliyinə məktubla müraciət etməlidirlər. Bəs prezidentliyə namizəd olan deputatlar artıq belə bir müraciəti Oqtay Əsədova yollayıblarmı?
Deputat Fərəc Quliyev Modern.az-a açıqlamasında bildirib ki, o, Milli Məclisin iclaslarında müntəzəm iştirak etməyə çalışacaq. “Düşünürəm ki, çox ciddi maneçilik olmayacaq. Milli Məclisin iclasları ayda iki-üç dəfə olur və məncə bu problem yaratmayacaq”.
İlyas İsmayılov da parlamentin iclaslarında iştirak etməyə çalışacaq. “İştirak etməməklə bağlı müraciət etmək hələ ağlıma gəlməyib. Əgər zərurət olarsa, müraciət edərəm”.
İqbal Ağazadə qeyd edib ki, bu görüşlərin nə vaxta təyin olunması və hansı qrafiklə keçirilməsi əsasında baş verə bilər. “Ondan sonra bilinəcək. Çox güman ki, Milli Məclisin ya bir, ya da iki iclası keçiriləcək. Buna görə heç kimə müraciət edəsi deyiləm, iclaslarda iştirak edəcəyəm”.
Aytən ƏLİYEVA
