Eldəniz Quliyev: “Milli Şuranın ehtiyat namizədi də seçkilərə bir neçə nəfərlə getməlidir”
Milli Şura ətrafında yaranan böhran getdikcə dərinləşir. “İki qoçun başı bir qazanda qaynamaz” misalını xatırlasaq, bu deyimin Milli Şuranın timsalında əbəs yerə səslənmədiyini söyləmək olar.
Doğrudur, bir-birlərinin varlıqlarını həzz etməyən liderlərin 20 ildən sonra bir araya gəlməsi tarixi hadisə idi. Amma, bu tarixilik özünü doğrultmadı desək, yəqinki yanılmarıq.
Seçki prosesinə rəsmən start verilsə də, Milli Şurada yekdil rəy yoxdur, vahid namizədi qoyub, ehtiyat vahid namizəd seçimi üzərində baş sındırılır.
Milli Şura üzvü Eldəniz Quliyev Modern.az-a açıqlamasında Şuranın ehtiyat namizədinin bir neçə nəfər olacağını bildirib.
Onun sözlərinə görə, ehtiyat namizədin kimliyinin gizlin qalması üçün bir neçə nəfərlə seçkiyə gedilə bilər.
“Milli Şurada heç kim istəmir ki, seçkilərdən kənarda qalaq. Hamımız istəyirik ki, Rüstəm İbrahimbəyovun namizədliyini son anadək dəstəkləyək. Hazırda müzakirələrimiz davam edir. Ümumi qərara gələndən sonra toplantı çağıracağıq”-deyə E.Quliyev bildirib.
Milli Şura üzvü ehtiyat namizədlə əlaqədar ad çəkmək istəmədiyini desə də, Rüstəm İbrahimbəyovun namizədinin kimliydən xəbərdar olduğunu vurğulayıb:
“Ad çəkmək yaranan fikir ayrılığına xeyir verməyən yanaşmadır. Biz “El” hərəkatı olaraq bir neçə ad çəkə bilərik. Əsas məsələ adda deyil, prinsipdədir.
Prinsip etibarı ilə razılaşdırmaq lazımdır ki, hətta ehtiyat namizədimiz varsa, o seçkilərə tək getməsin, bir neçə nəfərlə getsin. Bunu heç kim bilməsin ki, Milli Şuranın ehtiyat namizədi kimdir. Onun üçün ad Milli Şuranın strategiyasına uyğun deyil”.
E.Quliyev Milli Şuranın növbəti toplatısının nə zaman keçiriləcəyinin bəlli olmadığını qeyd edib.
“Partiyalar arasında danışıqlar gedir. Hələlik dəqiq vaxt demək çətindir. Bu məsələlərdə yekun qərar qəbul olunandan sonra sessiya çağırılacaq. Rüstəm müəllimin namizədinin kimliyini bilirik. O cümlədən mən də bilirəm”.
Anar RÜSTƏMOV
