Bu gün sosial şəbəkələrdə Goranboy rayonunda məskunlaşan kəlbəcərli məcburi köçkünlərin etiraz aksiyası keçirdiyi barədə xəbərlər yayılb. Həmin xəbərlərdə köçkünlərin Goranboyun icra başçısının onları incitdiyinə görə bu addımı atdıqları bildirilib. Hətta aksiyaçıları sakitləşdirmək üçün Goranboy polisinin müdaxilə etdiyi, Goranboy və Kəlbəcərin icra başçılarının hadisə yerində olduqları qeyd edilir.
Modern.az saytı dəqiqləşdirmə aparmaq üçün Kəlbəcərin icra başçısı Aqil Məmmədovla əlaqə saxlayıb. Bu gün Gəncə ərazisindən çıxmadığını deyən A.Məmmədov qeyd edib ki, yayılan məlumat doğru deyil:
“Gəncədə məcburi köçkünlər üçün mənzillər tikilib və istifadəyə veriləcək. Biz bu tədbirə hazırlaşırıq. Bu gün baş nazirin müavini, “Dövlətqaçqınkom”un sədri Əli Həsənov Gəncədə idi və bizə müəyyən tapşırıqlarını verdi. Demək istəyirəm ki, mənim bu gün Goranboyda olmağımla bağlı xəbər tamamilə yalandır. Əgər orada belə bir hadisə olsaydı, mütləq bizə xəbər verərdilər. Goranboy rayon İcra Hakimiyyətindən də belə hadisənin olduğu təkzib edilir”.
