“Builki abituriyentlərin nəticələri əvvəlki illərin nəticələrindən fərqlənmir”. Modern.az xəbər verir ki, bu sözləri Tələbə Qəbulu üzrə Dövlət Komissiyasının sədri Məleykə Abbaszadə bu gün keçirdiyi mətbuat konfransında deyib. “Sadəcə, builki nəticələr keçən ilki kimi dəyişməz qalıb. Hansısa müsbət istiqamətdə dəyişikliklər olmayıb". O bu gün ali məktəblərin boş qalan plan yerlərinə ikinci turun başa çatdığını bildirərək qeyd edib ki 10.495 nəfər sənəd verib və onların nəticələri bu günün sonuna kimi açıqlanacaq”.
M. Abbaszadə qeyd edib ki, 9 illik təhsil bazasından orta ixtisas təhsil müəssisələrinə rekord sayda abituriyent iştirak edir. “13.768 nəfəri əvvəlki illərin məzunlarıdır. Bir təəccüblü məqam budur ki, 11 illiyi bu il bitirənlərin 4737 nəfəri bu ilki, 4785 nəfəri isə əvvəlki illərin 11 illiyini bitirən məzunlarıdır”.
TQDK sədri abituriyentləri qeydiyyatdan keçməyə tələsdirib. “Ali məktəblərə qəbul olanların qeydiyyatı aparılır. Sadəcə, qeydiyyatdan keçənlərin sayı həm dövlət, həm də özəl yerlərə olduqca azlıq təşkil edir. Müraciətim odur ki, onlar tələssinlər, öz sənədlərini gətirib versinlər. Axırıncı günə saxlamasınlar, çünki axırıncı günlərdə müəyyən problemlər yarana bilər. Avqustun 29-a qədər vaxt var. Onların hər biri qeydiyyatdan keçməlidirlər. Ümumən 40% nəfər qeydiyyatdan keçib. Dövlət sifarişli yerlərə 56% nəfər qeydiyyatdan keçib. Magistraturaya daxil olan bakalavrlar avqustun 18-dən 28-ə kimi gəlib qeydiyyatdan keçməlidirlər. Ümumən magistraturaya 643 nəfər daxil olub. Onların yalnız 24%-i 165 nəfəri qeydiyyatdadır”.
Orta məktəbi qızıl və gümüş medalla bitirənlərə gəlincə, TQDK sədri bildirib ki, bu məzunlarla bağlı Təhsil Nazirliyinə məlumat göndərilib: “Bununla bağlı araşdırma aparılmalıdır. Düzdür, onların əksəriyyəti 600 baldan yuxarı nəticə göstərənlərdir. Təbii ki, onların arasında 499, 533, hətta 140 bal toplayanlar da var”, – deyə Məleykə Abbaszadə deyib.
Aytən Əliyeva
