Milli Şuranın növbəti iclası öz işinə başlayıb. Modern.az xəbər verir ki, şuranın kritik sessiyası Müsavat partiyasının qərargahında keçirilir. İclasda vahid namizədlə bağlı səngimək bilməyən və dalana dirənən müzakirələrə son qoyulacağı gözlənilir.
Yayılan qeyr-rəsmi məlumatlara görə isə əgər Milli Şura bu gün öz vahid namizədini müəyyən etməsə bu qurum dağılmaq təhlükəsi ilə üzləşəcək. Təşkilatın sədri və vahid namizədi Rüstəm İbrahimbəyovun ikili vətəndaşlığı həll olunmamış onun ABŞ-da yaşayış izni ilə olması ilə bağlı xəbərlərin yayılması gərilmiş əsəbləri bir az da tarıma çəkdi. Ona görə də MŞ bu gün öz növbədənkənar sessiyasını müəyyənləşdirməklə dalana dirənən vahid namizəd müzakirələrinə son qoymaq niyyətindədir.
***
Milli Şuranın iclasını Müsavat başqanı açıb. Gözlənildiyi kimi, müzakirələr ikinci ehtiyat namizəd məsələsi ilə başlayıb. İsa Qəmbər bugünkü iclasda bu məsələyə son qoymağın vacib olduğunu diqqətə çatdırıb.
Daha sonra KXCP sədri Mirmahmud Mirəlioğlu Milli Şura üzvlərinin ötən gün qəbul etdikləri etiraz bəyanatından söz açıb. KXCP sədri bu bəyanata görə şura üzvlərini qınayıb. O, həmkarlarına xəbərdarlıq edərək heç kimin KXCP-ni tənqid etməyə haqqı olmadığını nəzərə çatdırıb.
***
ACP sədri Sülhəddin Əkbər də ehtiyat namizəd məsələsinə toxunub. O Cəmil Həsənlinin ikinci namizəd olaraq irəli sürülməsinə qarşı olduğunu deyib. Partiya sədrinin sözlərinə görə, C.Həsənlinin namizədliyini irəli sürməklə bəziləri özlərini sığortalamaq istəyir.
***
Milli Şuranın iclasında Rüstəm İbrahimbəyovun məktubu oxunub. Məktubununda Milli Şura sədri alternativ namizəd olaraq Cəmil Həsənlinin namizədliyinin irəli sürülməsini bəyan edib.
***
Milli Şurada Cəmil Həsənlinin alternativ namizəd olaraq irəli sürülməsi üçün səsvermə keçirilib. Səsvermədə Milli Şuranın 74 üzvü iştirak edib. Modern.az xəbər verir ki, 1 əleyhinə, bir nəfər bitərəf, 73 leyinə olmaqda səsvermə başa çatıb. Cəmil Həsənli Milli Şuranın prezidentliyə namizədi seçilib.
Aqşin Kərimov
