Azərbaycanda yaşayan Dağ Yəhudiləri İcması oktyabrın 9-da keçiriləcək prezident seçkiləri ilə bağlı müraciət yayıb.
İcmadan Modern.az-a daxil olan müraciətdə bildirilir ki, Azərbaycan xalqı həmişə dağ yəhudilərinə dayaq olub, onları bütün bəlalardan müdafiə edib: “Məhz buna görədir ki, bizim xalqın nümayəndələri dünyanın hansı qitəsində yaşamasından asılı olmayaraq, nəsildən-nəsilə Azərbaycanı doğma vətəni sayaraq, Azərbaycan xalqı ilə doğmalaşıb. Bu qardaşlığın, belə qarşılıqlı hörmət - izzətin canlı təzahürü odur ki, prezident İlham Əliyevin sərəncamı ilə Azərbaycanda və bütün dünyada yaşayan dağ yəhudiləri üçün adət-ənənələrimizə, milli-mənəvi dəyərlərimizə uyğun olaraq Bakı şəhərində Sinaqoq inşa edilib.
Ulu öndər Heydər Əliyev məktəbinin davamçısı olan prezident İlham Əliyev cənablarının bu cür qayğısını gündəlik həyatımızda daima hiss edirik. Ona görə Azərbaycan Dağ Yəhudiləri İcması İlham Əliyevin yeritdiyi daxili və xarici siyasətini daima bəyənərək dəstəkləyib. Məhz həmin siyasətin nəticəsidir ki, Azərbaycan bu gün dünyanın iqtisadi cəhətdən yüksək inkişaf etmiş dövlətləri sırasındadır.
Məhz Azərbaycan xalqının yüksək mədəniyyətinin təzahürüdür ki, Azərbaycanda yaşayan bütün azsaylı xalqlar tam sərbəst, əmin-amanlıq şəraitində öz dini adət-ənənələrini və milli-mənəvi dəyərlərini qoruyub saxlayaraq, sakit və mehriban həyat sürürlər”. Qeyd olunanları nəzərə alaraq icma bəyan edib ki, prezident seçkiləri ərəfəsində Azərbaycanda yaşayan bütün dağ yəhudiləri yeganə, layiqli namizəd kimi İlham Əliyevi yekdilliklə dəstəkləyir.
Modern.az
