Azərbaycan telekanallarında əyləncə, müxtəlif musiqi və az sayda olsa da bilik yarışmaları üstünlük təşkil edir. Müharibə şəraitində olan ölkədə hərbi-vətənpərvərlik mövzusu arxa planda qalıb. Müxtəlif güc yarışları vasitəsilə gənlərin bu sahəyə diqqətini artıraq, eyni zamanda zamanda onlara hərbin sirlərini də öyrənməyə yardımçı olmaq nədənsə TV yayımçılarının fikrindən belə keçmir.
E. Məmmədovun sözlərinə görə, çox təəssüf ki, televiziyalarımız bu gün qəsdən millətin mənəviyyatını pozmaq üçün kimlərinsə öhdəsinə verilib və sutkanın hansı vaxtı kanalı dəyişdirəndə onları ekranda görürsən. “Bəzən, hətta, millətin xalqın mentalitetinə, mənəviyyatına aid olmayan cürbəcür şoular düzəldirlər. İşimizi biz daha məqsədyönlü istiqamətdə qurmalıyıq”. Deputat bu məsələmi Milli Məclisin payız sessiyasında da qaldıracaqlarını bildirib. “Vaxtaşırı bu istiqamətdə söhbətlər aparırıq və müəyyən dairələrdə də bu söhbətləri davam etdiririk”.
Hərbi ekspert, polkovnik-leytenant Üzeyir Cəfərov da televiziyalarda hərbi yarışların keçirilməsinin çox vacib olduğunu bildirib. “Əvvəla, gənclər bu yarışlardan özləri üçün çox şeylər öyrənirlər. Həm də sabahın əsgərləri və ailə başçıları bərkin-boşun, çətinliyin nədən ibarət olmasını daha yaxından hiss edirlər və başa düşürlər. Şəxsən başqa ölkələrin telekanallarında keçirilən belə yarışları həvəslə izləyirəm. Yadıma gəlir ki, keçmiş SSRİ zamanında Almanların bu istiqamətdə böyük işləri var idi. Televiziyada belə yarışları keçirməklə gəncləri hərbiyə, bir növ çətinliyə alışırdılar və onlar da buna maraq göstərirdilər”.
Ü. Cəfərov hesab edir ki, dövlət tərəfindən telekanallar bu istiqamətdə ciddi işlər görməlidirlər. “Onlar dövlət büdcəsindən və vətəndaşların verdikləri vergilərlə formalaşan telekanallar olduğuna görə, bilavasitə bu sahədə işlər görməyə borcludurlar. Amma təəssüflər olsun ki, şou biznesə üstünlük verirlər. Bu istiqamətdə onlar işi başlasalar dövlət də onlara dəstək olar. Vətəndaşlar da böyük həvəslə onların başladığı işə həm maddi, həm də mənəvi dəstək olarlar”.
Aytən ƏLİYEVA
